Ռուբեն Հայրապետյանը սպորտի նախարարին արգելել է հետաքրքրվել ֆուտբոլով

«Ժողովուրդ» թերթը գրում է. «ՀՀ սպորտի և երիտասարդության հարցերի նախարար Գաբրիել Ղազարյանը երեկ լրագրողների հետ զրույցի ժամանակ խոստովանել է, որ ինքը տեղյակ չէ, թե Հայաստանի ֆուտբոլի ֆեդերացիայում ինչ է կատարվում: Սա այն դեպքում, երբ Հայաստանի ֆուտբոլը հենց այն ոլորտն է, որտեղ ակնհայտ խայտառակ իրավիճակ է տիրում: Մի քանի տարի առաջ բոլորը մեծ հույսեր էին կապում Հայաստանի ֆուտբոլի ազգային հավաքականի հետ, քանի որ դրա կազմում բազմաթիվ բարձրակարգ ֆուտբոլիստներ ընդգրկվեցին: Սակայն Հայաստանի հավաքականը խայտառակ ձևով տապալվեց «Եվրո-2016»-ի ընտրական փուլում. ութ խաղերից վեցում պարտվեց, իսկ երկուսում կարողացավ միայն ոչ-ոքի խաղալ: Եվ պետք է արձանագրել, որ Հայաստանի ֆուտբոլը, թերևս, այն եզակի ոլորտներից է, որտեղ միանշանակ ակնհայտ է՝ տարվող քաղաքականությունը սխալ է, և փոփոխության պետք է ենթարկել:

Սպորտի և երիտասարդության հարցերով նախարարությունը ոչ միայն իրավունք չունի ֆուտբոլում տիրող իրավիճակին ծանոթ չլինել, այլև, որպես ոլորտում պետական քաղաքականություն իրականացնող գերատեսչություն, ուղղակի պարտավոր է ամենայն մանրամասնությամբ պարզել, թե ՀՖՖ-ում ինչ է կատարվում, և որոնք են ազգային հավաքականի ձախողման պատճառները՝ միջոցներ ձեռնարկելով իրավիճակը շտկելու համար: Սակայն նախարարը քաղաքական անմեղսունակություն դրսևորելով՝ հայտարարել է, թե անտեղյակ է:

Իհարկե, հասկանալի է, որ նախարար Գաբրիել Ղազարյանին ՀՖՖ նախագահ Ռուբեն Հայրապետյանը պարզապես արգելել է ֆուտբոլով հետաքրքրվել, և ինքը, «շառից-փորձանքից հեռու», այդ սպորտաձևի մասին մոռացել է: Բայց այդպես մի տեսակ սիրուն չէ»:

Առավել մանրամասն՝ թերթի այսօրվա համարում