Հովիկ Աբրահամյանն ու Դմիտրի Մեդվեդևը հանդիպել են

Տաջիկստանի մայրաքաղաք Դուշանբեում տեղի է ունեցել ՀՀ վարչապետ Հովիկ Աբրհամյանի և ՌԴ կառավարության ղեկավար Դմիտրի Մեդվեդևի հանդիպումը: Այդ մասին  պարզ է դառնում ՀՀ վարչապետի մամուլի խոսնակ Գահար Պողոսյանի՝ ֆեյսբուքյան էջում հրապարակված լուսանկարից: Հանդիպման մանրամասները դեռևս չեն հաղորդվում:

Ինչպես ավելի վաղ տեղեկացրել էր ՀՀ կառավարության տեղեկատվության և հասարակայնության հետ կապերի վարչությունը, ԱՊՀ անդամ պետությունների կառավարությունների ղեկավարների խորհրդի նիստի շրջանակում ՀՀ վարչապետ Հովիկ Աբրահամյանը հոկտեմբերի 30-ին Դուշանբեում նաև հանդիպել է Տաջիկստանի վարչապետ Կոհիր Ռասուլզոդայի հետ: Հանդիպման ընթացքում երկու երկրների վարչապետները քննարկել են փոխադարձ հետաքրքրություն ներկայացնող մի շարք հարցեր:

Զրուցակիցները կարևորել են տնտեսական, հումանիտար և այլ ոլորտերում, ինչպես նաև միջազգային կազմակերպությունների շրջանակներում համագործակցության խորացումը: Առևտրատնտեսական կապերի զարգացման առումով կողմերն անհրաժեշտ են համարել միջկառավարական հանձնաժողովի գործունեության ակտիվացումը, գործնական քայլերի իրականացումը, ինչը կնպաստի նաև առևտրաշրջանառության ծավալների աճին:

Հայաստանի և Տաջիկստանի կառավարությունների ղեկավարները կարևոր են համարել ընդլայնել ու խորացնել փոխգործակցությունն ինչպես երկկողմ, այնպես էլ բազմակողմ ձևաչափերում: