Մոսկվայից Երևան ընթացող մարդատար ավտոբուսի վթարի զոհերի թիվը հասել է 8-ի

Տուլայի մարզում ավտոբուսի վթարի հետևանքով մահացել է 68-ամյա Սպարտակ Քալբանդրյանը, հաղորդում է LifeNews-ը:

Ըստ պորտալի՝ տղամարդուն հիվանդանոց են հասցրել ծայրահեղ ծանր վիճակում: Ուղևորի մոտ ախտորոշվել է գանգի, կողերի ճեղքվածք, ուղեղի ցնցում և սուբդուրալ հեմատոմա:

Ավելի վաղ հաղորդվել էր յոթ զոհի մասին:

Հիշեցնենք՝ Տուլայի մարզում М-4 ավտոմայրուղու վրա շրջվել է ուղևորատար ավտոբուսը, ինչի հետևանքով զոհվել է յոթ մարդ, 47-ը՝ վիրավորվել, որոնցից 17-ը հոսպիտալացվել է:

Վարկածներից մեկի համաձայն՝ ավտոբուսի վարորդը քնել է ղեկին, ողբերգության մյուս հավանական պատճառը տեխնիկական խափանումն է եղել: