Ջոան Ռոուլինգը նոր գիրք է գրում երեխաների համար

Հարի Փոթերի մասին վիպաշարի հեղինակ անգլուհի Ջոան Ռոուլինգը հայտարարել է, որ նոր մանկական գիրք է գրում, տեղեկացնում է «Արմենպրես»-ը՝ հղում անելով բրիտանական Telegraph թերթին: Հրատարակության տվյալներով՝ Ռոուլինգը կախարդ-տղայի՝ Հարի Փոթերի մասին վերջին գիրքն ավարտել է 2007 թվականին և այդ ժամանակվանից գրքեր է գրել միայն մեծահասակների համար, ընդ որում՝ դրանցից մի քանիսը Ռոբերտ Գելբրեյթ կեղծանվամբ:

«Ես չեմ պատրաստվում ձեզ հայտնելու ստույգ ժամկետը, քանի որ ամեն ինչ փոխվում է, և այժմ ես նաև սցենարներ եմ գրում: Բայց որոշակիորեն ավելի շատ վեպեր կգրեմ Ջ. Մ. Ռոուլինգ անվամբ: Գրել եմ մանկական գրքի մի մասը, որն ինձ շատ է դուր գալիս: Ես իրոք այն կավարտեմ»,- մեջբերում է հրատարակությունը գրողի խոսքը:

Ջոան Ռոուլինգը Հարի Փոթերի մասին յոթ գրքերի հեղինակն է, որոնք հրատարակվել են 1997 – 2007 թվականներին և թարգմանվել 65 լեզուներով: Դրանց ընդհանուր տպաքանակը գերազանցում է 400 միլիոն օրինակը: 2011 թվականին էկրաններ է բարձրացել «փոթերապատումի» էկրանավորման վերջին սերիան: «Հարի Փոթեր» առևտրանիշն այժմ գնահատվում է 7 միլիարդ ֆունտ ստեռլինգ, հաղորդել է ՌԻԱ Նովոստին: