Ստեփանավանի օդանավակայանը չի ծառայելու ռազմական նպատակներին. Արմեն Երիցյան

Տարածքային կառավարման և արտակարգ իրավիճակների նախարար Արմեն Երիցյանը հերքեց այն տեղեկատվությունը, թե Ստեփանավանի օդանավակայանը կարող է օգտագործվել նաև ռազմական նպատակներով: «Մի-24 ուղղաթիռները մեզ հարկավոր են ծանր բեռներ տեղափոխելու համար և մենք այդ ուղղությամբ արդե ն աշխատում ենք մեր ռուս գործընկերների հետ: Ստեփանավանի օդանավակայանը մենք օգտագործելու ենք մեր նախարարության գործառույթների իրագործման նպատակով, բայց հետագայում եթե հնարավոր լինի այլ ուղղություններով (օրինակ' գյուղատնտեսական) մենք պատրաստենք ենք նաև դրան»,- «Արմենպրես»-ի հաղորդմամբ' լրագրողների հետ զրույցում հայտնեց նախարարը' հավելելով, որ Ստեփանավանի օդանավակայանը չի ծառայելու ռազմական նպատակների համար:

Ազգային ժողովում կայացած ՀՀ 2016 թվականի պետական բյուջեի քննարկմանը Տարածքային կառավարման և արտակարգ իրավիճակների նախարար Արմեն Երիցյանը, պատասխանելով ԱԺ փոխնախագահ Էդուարդ Շարմազանովի հարցին, հայտնեց, որ Ստեփանավանի օդանավակայանի շինարարական աշխատանքները կավարտվեն 2016 թվականին: «Մենք նաև պայմանավորվել ենք ռուս գործընկերների հետ, որ մեզ այդ օդանավակայանում պետք են ծանր ուղղաթիռներ. խոսքը ՄԻ-24-ի, ԿԱ-72- ի մասին է: Մենք պայմանավորվել ենք, որ այդ օդանավակայանում հերթապահություն են անելու այդ ուղղաթիռները»,- ընդգծել է Երիցյանը:

Նա հավելեց, որ թեթև ուղղաթիռների ներգրավման ուղղությամբ լուրջ աշխատանքներ են տարվում ինչպես ռուս, այնպես էլ շվեյցարացի և ֆրանսիացի գործընկերների հետ: «Մենք ամեն ինչ անում ենք Ստեփանավանում լուրջ օդանավակայան ունենալու համար»,- եզրափակեց Երիցյանը: