Եգիպտոսում A-321 ինքնաթիռի կործանումն անհանգստություն է առաջացրել հայ զբոսաշրջիկների մոտ

Շարմ Էլ Շեյխից Սանկտ Պետերբուրգ թռչող ռուսական A-321 ինքնաթիռի կործանումը լուրջ անհանգստություն է առաջացրել նաև հայ զբոսաշրջիկների մոտ, և Հայաստանում գործող տուրիստական գործակալությունները փաստում են, որ որ Եգիպտոս մեկնող զբոսաշրջիկների մոտ նկատվում է թեթև խուճապ: «Արմենպրես»-ի թղթակիցը զրուցել է Հայաստանում գործող ավելի քան մեկ տասնյակ տուրիստական գործակալությունների ներկայացուցիչների հետ և պարզել, որ ինքնաթիռի կործանումից հետո գրեթե ամեն օր ստանում են մի քանի տասնյակ զանգեր՝ ճշտելու՝ արդյո՞ք կարող են դեպի Շարմ Էլ Շեյխ իրենց տոմսը փոխել:

«Շատերն էլ զանգում են պարզապես ճշտելու, թե ինչ իրավիճակ է այնտեղ: Բազմաթիվ զբոսաշրջիկների անհանգստացրել է այն հանգամանքը, որ մի քանի խոշոր ավիաընկերություններ հրաժարվել են Շարմ Էլ Շեյխ թռիչքներից: Շատերն էլ սպասում են հավաստիացման՝ արդյոք ինքնաթիռը կործանվել է տեխնիկական անսարքության պատճառով, թե ահաբեկչության կամ այլ պատճառներով: Եթե երկրորդ տարբերակը հաստատվի, ապա զանգերն ու տոմսերի հետ վերադարձն ավելի զանգվածային կդառնա»,- ասաց տուրիստական գործակալություններից մեկի մենեջեր Աննա Մարգարյանը՝ հավելելով, որ շատ հաճախ զբոսաշրջիկները զանգահարում են, որպեսզի տուրիստական գործակալությունից հավաստիանան, որ մեկնելով Եգիպտոս՝ չեն վտանգի իրենց կյանքը: «Մենք, բնականաբար, նրանց ներկայացնում ենք իրավիճակը: Մենք էլ մշտական կապի մեջ ենք Եգիպտոսում աշխատող մեր գործընկերների հետ և նրանք էլ փաստում են, որ այնտեղ հանգստացողների մոտ էլ կա լուրջ տագնապ, որը բնական է»,- ասաց Մարգարյանը:

Տուրիստական մեկ այլ գործակալության տնօրեն Նաիրա Հովհաննիսյանն էլ փաստում է, որ վերջին 3 օրվա ընթացքում ստացել է բազմաթիվ զանգեր Եգիպտոսի հետ կապված: «Եգիպտոս մեկնող մեկ զույգ եկավ և ճշտեց, թե արդյոք կարող է փոխել տոմսը և այլ ուղղություն ընտրել: Մենք նրանց ներկայացրեցինք պայմանները, և զույգը ժամանակ խնդրեց մտածելու համար: Տոմսերի հետ կապված այլ վերադարձ դեռ չի եղել, սակայն եթե հաստատվի, որ ինքնաթիռը կործանել են ահաբեկիչները, ապա, բնականաբար, սպասում ենք տոմսերի վերադարձի մեծ հոսքի»,- ասաց Հովհաննիսյանը:

Տուրիստական գործակալությունների մենեջերները փաստում են, որ Եգիպտոսը հայ զբոսաշրջիկների ամենասիրելի ուղղություններից մեկն է, և շատերը ցանկանում են իրենց Ամանորն ու Սուրբ ծնունդն անցկացնել բուրգերի երկրում: Հաշվի առնելով զբոսաշրջիկների մեծ հոսքը' այս տարի ավելի քան մեկ տասնյակ տուրիստական գործակալություններ հայտարարել են, որ դեկտեմբերի վերջին չարթերային թռիչքներ են բացելու դեպի Շարմ Էլ Շեյխ: Տուրիստական գործակալները շեշտում են, որ այդ ժամանակ պատկերն ավելի ցայտուն կլինի, քանի որ ինքնաթիռի կործանման վերաբերյալ մանրամասներ ն էլ ավելի հստակ կդառնան և պարզ կդառնա՝ որքանով կշարունակի Եգիպտոսը մնալ գրավիչ հայ զբոսաշրջիկների համար:

Համաձայն տուրիստական գործակալությունների ներկայացրած տվյալների, տարիներ շարունակ Եգիպտոսը հայերի նախընտրելի ուղղությունների եռյակում է: Թե՛ ձմռանը, թե՛ ամռանը հայերը նախընտրում են Շարմ էլ Շեյխ և Հուրգադա զբոսաշրջային վայրերը: Գործակալություններում դա բացատրում են այն հանգամանքով, որ Եգիպտոսը մատչելի ուղղություն է և ունի լիարժեք հանգստի համար բոլոր անհրաժեշտ պայմանները: Կարևոր հանգամանք է նաև վիզային ռեժիմի բացակայությունը: Զբոսաշրջային կենտրոններ այցելության համար վիզա անհրաժեշտ չէ, իսկ մայրաքաղաք Կահիրե այցելության համար անհրաժեշտ է վճարել 25 դոլար և վիզան ստանալ հենց օդանավակայանում: «Հաճախ զբոսաշրջիկները կարևորում են նաև այն, որ չպետք է դեսպանատուն դիմեն և բյուրոկրատական քաշքշուկների մեջ ընկնեն»,- ասացին գործակալությունում: