ԱԳՆ-ն աշխատում է Հվ. Սուդանում զոհված՝ ՀՀ քաղաքացիների աճյունների տեղափոխումն արագացնելու ուղղությամբ. ԱԳ փոխնախարար

ՀՀ արտաքին գործերի նախարարությունը քայլեր է ձեռնարկում Հարավային Սուդանում բեռնատար ինքնաթիռի կործանման հետևանքով զոհված ՀՀ քաղաքացիների աճյունների իդենտիֆիկացումն ու տեղափոխումն արագացնելու համար: Այս մասին Ազգային ժողովում լրագրողների հետ զրույցում ասաց ՀՀ ԱԳ փոխնախարար Կարեն Նազարյանը։

«Մոտ մեկ մեկ ժամ առաջ, իմ տեղեկություններով, դեպքի վայր է ժամանել մեր հյուպատոսը, և աշխատանքներ են տարվում՝ որքան հնարավոր է արագ վերջացնել աճյունների իդենտիֆիկացումը, որից հետո ձեռնամուխ կլինեն տեղափոխման աշխատանքներին: Ես դժվարանում եմ հստակ ասել, թե երբ կիրականացվի տեղափոխությունը, որովհետև այդ հարցում ասելիք և անելիք ունի նաև այն ընկերությունը, որին պատկանում էր ինքնաթիռը»,- «Արմենպրես»-ի հաղորդմամբ՝ նշեց փոխնախարարը՝ ևս մեկ անգամ կրկնելով, որ ՀՀ ԱԳՆ-ն մշտապես կապի մեջ է և ցանկանում է ամեն ինչ անել գործընթացներն արագացնելու համար:

Նազարյանը հավելեց, որ Հարավային Սուդանում «ԱՆ-12» ինքնաթիռի կործանումից անմիջապես հետո ՀՀ արտգործնախարարությունը ձեռնամուխ է եղել համապատասխպան քայլերի՝ կապ հաստատելով Կահիրեում ՀՀ դեսպանության հետ: «Ցավալի դեպքից անմիջապես հետո մենք ձեռնամուխ ենք համապատասխան քայլերի, Կահիրեում մեր դեսպանությանը տրված է համապատասխան հանձնարարական, նա էլ իր հերթին կապի մեջ է գտնվում Գաբոնում Ռուսաստանի դեսպանության հետ, որը նաև համատեղության կարգով հավատարմագրված է Հարավային Սուդանում: Երեկ դեպքի վայրում է եղել ՌԴ դեսպանության ներկայացուցիչը, որն ուղղակի կապի մեջ է Կահիրեում մեր դեսպանի հետ»,- ասաց Կարեն Նազարյանը: