Պատգամավորը ԵԽԽՎ-ում հայկական կողմի համար վիճահարույց զեկույցի դեմ միասնական աշխատանքի կարիք է տեսնում

ՀՀ Ազգային ժողովի «Ժառանգություն» խմբակցության քարտուղար Թևան Պողոսյանը համակարգված աշխատանքի անհրաժեշտություն է տեսնում ԵԽԽՎ-ի լիագումար նիստում ԼՂՀ-ի հետ կապված վիճահարույց զեկույցի տապալման նպատակով: «Զեկույցը հունվարին կլինի ԵԽԽՎ լիագումար նիստի օրակարգում, այնտեղ մեր խնդիրն է՝ միասին աշխատանք տանել, որպեսզի մոբիլիզացվեն բոլոր ուժերը ու թույլ չտրվի ադրբեջանական լոբբինգի հաղթանակը»,- «Արմենպրես»-ի հաղորդմամբ' լրագրողների հետ հանդիպմանը շեշտեց Թևան Պողոսյանը:

Պատգամավորը նշեց, որ Ադրբեջանը մի քանի տարի է՝ փորձում է ԵԽԽՎ-ում իր ֆինանսական ռեսուրսների հաշվին ձևավորել մի համակարգ, որում տարբեր պատգամավորներ, գերվելով ադրբեջանական նավթադոլարներով, պատրաստ են աշխատել նրանց օգտին: Այս իմաստով բացառություն չէ նաև Եվրոպայի խորհրդի խորհրդարանական վեհաժողովի զեկուցող Ռոբերտ Ուոլտերը, ով ստանձնել է վիճահարույց և Ադրբեջանի կողմից թելադրված զեկույցի պատրաստումը: «Ադրբեջանի ԱԳՆ-ի կողմից գրված զեկույց է, որը որևէ քննադատության չի դիմանա այն մարդկանց կողմից, ովքեր ինչ-որ չափով ծանոթ են տարածաշրջանի խնդիրներին»,- ասաց Թևան Պողոսյանը՝ հայտնելով, որ հայաստանյան պատվիրակությունն ի սկզբանե չի մասնակցել իր համար վիճահարույց անվանումով զեկույցի պատրաստմանը:

Պատգամավորի խոսքով՝ ստեղծվել է մի փաստաթուղթ, որին հղում է կատարելու միայն ադրբեջանական կողմը: Դրանով չեն առաջնորդվելու ոչ Մինսկի խմբի համանախագահությունը, ոչ հայկական կողմը, ոչ էլ միջազգային կազմակերպությունները: «Այստեղ մի բան պիտի գիտակցենք, որ որևէ բան այսպիսի փաստաթղթով չի որոշվելու, խնդրի լուծումը Լեռնային Ղարաբաղի Հանրապետության ձեռքերում է: Եթե ունենանք հզոր բանակ, զարգացած տնտեսություն, ժողովրդավարական երկիր, ապա այդպիսի փաստաթղթերն ազդեցություն չեն ունենա, բացի գլխացավանք լինելուց»,- նկատեց Թևան Պողոսյանը:

«ԵԽԽՎ քաղաքական հարցերով հանձնաժողովը հավանության է արժանացրել «Բռնությունների աճը Լեռնային Ղարաբաղում և Ադրբեջանի այլ գրավյալ տարածքներում» վերտառությամբ վիճահարույց զեկույցի նախագիծը: