Էլվիս Փրեսլիի If I Can Dream սկավառակը գլխավորել է ալբոմների բրիտանական հիթ-շքերթը

Էլվիս Փրեսլին վերստին գլխավորել է UK album charts ալբոմների բրիտանական հիթ-շքերթը: Կատարողի If I Can Dream սկավառակը՝ Թագավորական ֆիլհարմոնիկ նվագախմբի գործիքավորմամբ, չարտի առաջատարն է դարձել 79 հազար օրինակների վաճառքից հետո, տեղեկացնում է «Արմենպրես»-ը՝ հղում անելով Daily Mail-ին:

Սա արդեն 12-րդ անգամ է, երբ երգչի հավաքածուները զբաղեցնում են UK album charts-ի վարկիանիշի առաջին հորիզոնականը: Փրեսլիի ալբոմները բրիտանական հիթ-շքերթներում առավել հաճախ են առաջին տեղը գրավել, քան որեւէ ուրիշինը:

Մրցանակն ստացել է երգչի նախկին կինը՝ Պրիսցիլա Փրեսլին: Նրա խոսքով՝ Փրեսլին միշտ ցանկանում էր թողարկել այդ ալբոմը, եւ նա շատ գոհ կլիներ, որ ինքն առաջվա պես երկրպագուներ ունի: «Ալբոմն ստեղծվել է տաղանդավոր թիմի կողմից, որը մեզ օգնեց իրականացնել նրա երազանքը»,- ասել է երգչի կինը:

Սինգլների բրիտանական հիթ-շքերթում երկրորդ շաբաթն անընդմեջ առաջին տեղում Է մնում Ադելը՝ Hello երգով, երկրորդ տեղում Ջասթին Բիբերն է՝ Sorry հիթով:

Էլվիս Փրեսլին մահացել է 1977 թվականին: Նա ճանաչվել է կոմերցիոն առումով 20-րդ դարի փոփ-երաժշտության ամենահաջողակ կատարողներից մեկը: ԱՄՆ-ում երգիչն ստացել է «ռոք-ն-ռոլի արքա» մականունը՝ այդ ժանրի զարգացման գործում ներդրած ավանդի համար: Փրեսլիի ստեղծագործությունները թողարկվում են մինչ այժմ: Մասնագետների գնահատմամբ՝ ամբողջ աշխարհում վաճառվել է նրա ձայնագրությունների ավելի քան 1 մլրդ սկավառակ: