Սոսո Պավլիաշվիլին հայ երիտասարդներին տոն պարգևեց

Երգիչ Սոսո Պավլիաշվիլին իր երևանյան համերգի ընթացքում տոն պարգևեց հայ երիտասարդներին: Նոյեմբերի 10-ին Կ. Դեմիրճյանի անվան մարզահամերգային համալիրում անցկացված և Երիտասարդության համաշխարհային և Ուսանողության միջազգային օրերի առթիվ կազմակերպված համերգին մասնակցեցին բազմաթիվ երիտասարդներ. դահլիճը լեփ-լեցուն էր:

«1997 թվականին' նախորդ դարում, այս հիասքանչ դահլիճում' այս սուրբ հողի վրա առաջին անգամ համերգ տվեցի: Ես այն ժամանակ երիտասարդ ու գեղեցիկ էի: Հիմա միայն գեղեցիկ եմ, ցավդ տանեմ: Ես երջանիկ եմ, որ այսքան տարիներից հետո ձեզ հետ եմ»,-«Արմենպրես»-ի փոխանցմամբ' բեմից ողջունելով համերգի մասնակիցներին նշեց Սոսո Պավլիաշվիլին: Երգիչն իր խոսքն ուղղելով հայ երիտասարդներին շեշտեց, որ հենց նրանք են հզոր Հայաստանի ապագան:

Սոսո Պավլիաշվիլին հայկական բեմում կատարեց հին և նոր ստեղծագործություններ, այդ թվում մեր մայրաքաղաքին նվիրված «Երևան» երգը: Համերգին ներկա երիտասարդներն էլ երգեցին ու պարեցին Պավլիաշվիլիի հետ: Դահլիճում տեղադրված տեսաէկրանին ցուցադրվեցին Պավլիաշվիլիի տարբեր երգերի տեսահոլովակները:

Սոսո Պավլիաշվիլիի համերգը կազմակերպել էին Հայաստանի երիտասարդական հիմնադրամն է և ՀՀԿ Երիտասարդական կազմակերպությունը: Ավելի վաղ լրագրողների հետ զրույցում երգիչը խոստովանել էր, որ իր համար Հայաստան գալը միշտ տոն է, և մեր երկրում է լինում տարեկան 5-6 անգամ: