«Կարող ենք ասել, որ Միկան ուշադրության կենտրոնում է, ֆավորիտների թվում է». Գոհար Գասպարյան (տեսանյութ)

«Մանկական եվրատեսիլ-2015»-ի հայաստանյան մասնակից Միկան (Միքայել Վարոսյան) ուրախ տրամադրությամբ մեկնում է Սոֆյա՝ մասնակցելու հեղինակավոր մրցույթին:

«Ես արդեն երեք տարի մասնակցում եմ մրցույթի նախընտրական փուլերին: Իմ երազանքն այս տարի կատարվեց: Շատ ուրախ տրամադրությամբ եմ մեկնում: Արդեն լսել եմ բոլորի երգերը, շատ լավն են: Ինձ թվում է՝ թեժ մրցակցություն է լինելու: Բուլղարիայի մասնակցին գիտեմ, միասին նախորդ տարի մասնակցել ենք «Սլավյանսկի բազար» միջազգային մրցույթին»,-«Արմենպրես»-ի փոխանցմամբ' լրագրողների հետ հանդիպման ժամանակ նշեց «Մանկական եվրատեսիլ- 2015»-ի հայաստանյան մասնակից Միկան:

Պատանի երգիչը գաղտնիքներ չի բացահայտում շոուի հետ կապված: «Շոուն լինելու է պարային և գունեղ: Այս տարի ռոքնռոլ ոճի երգ ենք ներկայացնում, շատ եմ հավանում»,- նշեց նա: Միկան լրագրողների հետ հանդիպմանը հետ բերել էր իր թալիսման տիկնիկ Միկային: «Ինձ համար ամենակարևորը լավ ելույթն է, իմ գրաված հորիզոնականը մրցույթի ավարտին կտեսնենք»,- հավելեց նա:

«Եվրատեսիլ»-ի հայաստանյան պատվիրակության ղեկավար Գոհար Գասպարյանը տեղեկացրեց, որ իրենք նոյեմբերի 15-ին մեկնելու են Սոֆիա, որտեղ նոյեմբերի 21-ին տեղի կունենա «Մանկական եվրատեսիլ- 2015»-ը:

«17 երկիր է մասնակցում, աննախադեպ թիվ է: «Մանկական եվրատեսիլ»-ը գնալով բարձրացնում է իր վարկանիշը, նույնիսկ Ավստրալիան է մասնակցում այս տարի: Բարձր տրամադրությամբ պատրաստվում ենք գնալ այնտեղ: Միկայի հետ բեմում կլինեն 3 աղջիկ, ուրախ, գունեղ, պայծառ, պարային պատանեկան շոու է լինելու: Մենք ապահովելու ենք մրցույթի բարձր տրամադրությունը, քանի որ այս տարի գերակշռում են դանդաղ ստեղծագործությունները»,- նշեց Գոհար Գասպարյանը:

«Եվրատեսիլ»-ի հայաստանյան պատվիրակության ղեկավարը շեշտեց, որ նախնական կանխատեսումները բավականին դրական են և հուսադրող: «Կարող ենք ասել, որ Միկան ուշադրության կենտրոնում է, ֆավորիտների թվում է»,- նշեց նա՝ հավելելով, որ երգիչը նոյեմբերի 17-ին հանդիպելու է Բուլղարահայ համայնքի ներկայացուցիչների հետ:

Միքայելի ամենամեծ երազանքն արդեն իրականություն է. նա 2012-ից սկսած մասնակցել է «Մանկական եվրատեսիլ»-ի հայաստանյան բոլոր փուլերին, սակայն բաղձալի երազանքին հասնելու համար մի քանի տասնորդական միավորներ չեն բավականացրել: 12-ամյա Միքայելը երաժշտության ասպարեզում իր առաջին քայլերն արել է դեռեւս 6 տարեկանից, սկսել է երաժշտական կրթություն ստանալ, հետագայում՝ մասնակցել միջազգային մրցույթների:

2012-ին մասնակցել է «Նոր ալիք» մրցույթի հայաստանյան ընտրական փուլին: 2014 թվականին՝ Վիտեբսկ քաղաքում անցկացվող «Սլավյանսկի բազար» միջազգային մրցույթին, որտեղ ներկայացրել է Հայաստանը և գրավել 3-րդ տեղը: 2014 թվականից նա իրեն սկսել է փորձել նաև հեռուստատեսային աշխարհում և սկսել է վարել «Փազլ» մանկական հաղորդումը:

Հայաստանի ներկայացուցիչն այս տարի կներկայացնի ռոքնռոլ ժանրի երգ, որը թարմություն է և նորություն մրցույթի հայաստանյան մասնակցության պատմության մեջ: Միկան երգի միջոցով բարություն ու սեր է տարածելու մարդկանց մեջ՝ հաղորդելով նրանց բարձր պարային տրամադրություն: Երգը կրում է «LOVE/Լավ» խորագիրը: Երաժշտության հեղինակն է Լիլիթ Նավասարդյանը, խոսքերի հեղինակը՝ Ավետ Բարսեղյանը, երաժշտության և խոսքերի համահեղինակն է Միքայել Վարոսյանը:

«Մանկական եվրատեսիլ-2015»-ի մասնակից երկրները 17-ն են՝ Հայաստան, Ալբանիա, Բելառուս, Բուլղարիա, Մակեդոնիա, Վրաստան, Իռլանդիա, Իտալիա, Մալթա, Մոնտենեգրո, Ռուսաստան, Սերբիա, Սլովենիա, Նիդերլանդներ, Ուկրաինա, Սան Մարինո, Ավստրալիա:

Երգի տոնն այս տարի կանցկացվի #Discover («Բացահայտի՛ր») նշանաբանով նոյեմբերի 21-ին Բուլղարիայի մայրաքաղաք Սոֆիայում: