Լևոն Զուրաբյանի մոտ մանկությունը մի փոքր երկար է ձգվում. Վահրամ Բաղդասարյան

Ազգային ժողովի ՀՀԿ խմբակցության ղեկավար Վահրամ Բաղդասարյանն արձագանքեց ՀԱԿ խմբակցության ղեկավար Լևոն Զուրաբյանի հայտարարությանը, թե դեկտեմբերի 6-ի սահմանադրական բարեփոխումներից հետո իշխանությունները շատ ծանր վիճակում են հայտնվելու, քանի որ ականատես են լինելու «ոչ»-ի հաղթանակին: Ազգային ժողովում խորհրդարանական ճեպազրույցների ժամանակ Վահրամ Բաղդասարյանն ընդգծեց, որ 1998 թ. հետո Լևոն Զուրաբյանի մանկության երազանքն է իշխանություններին ծանր վիճակում տեսնելը: «Գիտեք, մենք 1998 թվականից լսում ենք տարբեր բաներ՝ դեկտեմբերի 6, նոյեմբերի 1, աշուն, գարուն: Դա այդ գործչի վաղեմի երազանքն է: Նրա մոտ նոր մանկություն է արթնացել, և դա նրա մանկական երազանքն է: Իհարկե, նրա մոտ մանկությունը մի փոքր երկար է ձգվում, բայց ոչինչ, մենք դա կհանդուրժենք: Ես կարծում եմ, որ դեկտեմբերի 6-ին ժողովուրդը կտա իր դրական պատասխանը, դրանից հետո դուք կարող եք տեսնել, թե «ոչ»-ի ճամբարը ինչ վիճակում է հայտնվելու»,- ընդգծեց Բաղդասարյանը:

Անդրադառնալով հարցին, թե «ոչ»-ի կողմնակիցները իրավիճակը հանրաքվեից առաջ ցնցումային են գնահատում՝ Վահրամ Բաղդասարյանը նկատեց, որ ինքն էլ է ցնցումային գնահատում «ոչ»-ի համար, քանի որ նրանք այդպես էլ չեն կարողանում հիմնավորել, թե ինչի համար պետք է «ոչ» ասել սահմանադրական բարեփոխումերին: «Ես պետք է ասեմ, որ շատ հանգիստ մթնոլորտում է անցնում քարոզարշավը: Առաջին փուլը մենք գնահատում ենք հետախուզական փուլ: Ես շատ ուրախ եմ, որ «ոչ»-ի և «այո»-ի կողմնակիցները կարողանում են քարոզչությունը կազմակերպել մեկ ընտանիքի նման, ինչը նշանակում է, որ մեզ մոտ նոր մշակույթ է ձևավորվել: Հասկանալի է դառնում, որ սահմանադրական բարեփոխումերը ոչ թե մեկ անձի համար են, այլ՝ մեր ժողովրդի: Եվ «ոչ»-երն են մերը, և «այո»-ները: Ամեն ինչ պարզ կլինի դեկտեմբերի 6-ին, երբ հանրությունը կտա իր վերջնական պատասխանը»,- հավելեց ՀՀԿ խմբակցության ղեկավարը: