Ընտրությունների վերահսկման միասնական շտաբը դիմում է Սահմանադրական դատարան

Ընտրությունների վերահսկման միասնական շտաբի համար թիվ մեկ հարց է եղել ընտրացուցակների խնդիրը, որոնք ակնհայտորեն ուռճացված են, և խոսքը այնպիսի մեծ թվերի մասինէ, որ եթե վիրտուալ ընտրողները չմաքրվեն, ընտրությունները արժեզրկվելու են: Այս մասին այսօր շտաբի նիստի ժամանակ հայտարարեց ՀՔՄ նախագահ Հմայակ Հովհաննիսյանը՝ հավելելով, որ խոսքը ընտրացուցակներում շուրջ 400.000 գոյություն չունեցող անունների առկայության մասին է:

«Միակ միջոցը Ազգային ժողովի կազմի մեկ հինգերորդի՝ քսանյոթ պատգամավորի դիմումն է ՍԴ: Եվ քանի որ շտաբի հիմնադիր չորս կուսակցություններից երեքը ունեն խմբակցություններ, այդ խնդիրը կարող է լուծվել նրանց ՝ ՍԴ դիմելու միջոցով, որ այն արագացված ընթացակարգով նայի դիմումը՝ Սահմանադրությանը հակասող ճանաչել ընտրական օրենսգրքի այն կետերը, որոնք արգելափակում են ընտրողների ցուցակի հրապարակումը»,- հայտարարեց Հովհաննիսյանը:

Նա ասաց, որ եթե իշխանությունները ժխտողական մոտեցում չցուցաբերեին երկրից բացակայող, բայց ընտրելու իրավունք ունեցող մարդկանց ցուցակները տրամադրելու հարցում և համաձայնեին համատեղ աշխատանքի, հնարավոր կլիներ հաղթահարել վարչական պատնեշները:

Հիշեցնենք, որ շտաբը կազմավորվել է ապրիլի 4-ին: Շտաբի կազմում են ՀԱԿ-ը, ՀՅԴ-ն, ԲՀԿ-ն: «Ժառանգությունն» իր ստորագրությունը հետ չի վերցրել, բայց չի մասնակցում շտաբի աշխատանքներին: