Ընտրացուցակները հիմնովին կեղծված են, պատրաստվում են լայնամասշտաբ կեղծարարություններ. Լևոն Զուրաբյան

Ընտրացուցակները հիմնովին կեղծված են, պատրաստվում են լայնամասշտաբ կեղծարարություներ, և դրա դեմ պայքարի միակ ձևն այն է, որ ՀՀ քաղաքացիները հանրային վերահսկողություն կատարեն ցուցակների վրա: Այս մասին այսօր ընտրությունների վերահսկման միասնական շտաբի նիստի ժամանակ հայտարարեց ՀԱԿ համակարգող Լևոն Զուրաբյանը:

«Աննորմալ քանակ է այն հասցեների թիվը, որոնցում տասից ավելի մարդ է գրանցված: Կան շենքեր, որոնք գոյություն չունեն կամ մարդ չի ապրում, բայց ընտրողները ցուցկաներում ներկայացված են: Թիվ 6 ընտրատարածքում առաջադրված մեր թեկնածուն՝ Ավետ Պողոսյանը դիմել է ընտրական հանձնաժողովին՝ խնդրելով ապահովել քարոզչության հնարավորությունները այդ ընտրողների համար: Առայժմ պատասխան չունենք»,- տեղեկացրեց Զուրաբյանը:

Զուրաբյանը նշեց, թե Հայաստանում գոյություն ունի մի պետական գաղտնիք, որը ավելի ամուր է պահվում, քան, ասենք, մեր սպառազինությունների մասին տեղեկությունները:

«Չկա որևէ ատյան, որը կարողանա պարզել կամ ստուգել այդ տեղեկությունները: Սա զավեշտ է, որը նշանակում է, որ իրականում Հայաստանում անհնար է պարզել որևէ իշխանության լեգիտիմությունը: Սրանով խախտվում է Սահմանադրության 2-րդ հոդվածը, որտեղ նշվում է, որ Հայաստանը ժողովրդավարական երկիր է և իշխանությունները ձևավովում են ժողովրդի կողմից»,- հայտարարեց Զուրաբյանը՝ հույս հայտնելով, որ ՍԴ-ն ողջամիտ որոշում կկայացնի:

ՀԱԿ համակարգողի խոսքով՝ շտաբը ՍԴ դիմելու որոշումը ներկայացրել է նաև «Ժառանգության» պատգամավորներին և նրանցից է կախված՝ միանում են հայցին, թե ոչ: