Լևոնը չեկավ. նա չի հավատում հաղթանակին

Ազատության հրապարակում տեղի ունեցած ՀԱԿ հանրահավաքը, որին մասնակցել է մոտ հազար մարդ, չէր կարող գոհացնել Լևոն Տեր-Պետրոսյանի թիմին: Պատահական չէ, որ Արամ Մանուկյանի քննադատության թիրախները երկուսն էին̀  Սերժ Սարգսյանը ու հրապարակ չգնացող ֆեյսբուքահայությունը:

Սակայն, հատկանշական է, որ հանրահավաքին չէր մասնակցում նաև Լևոն Տեր-Պետրոսյանը̀ էապես նսեմացնելով քաղաքական ակցիայի նշանակությունը: ՀԱԿ-ում հազար ու մի պատճառով կարող են արդարացնել իրենց առաջնորդի բացակայությունը՝ ասել, որ իրենց վճռական հանրահավաքը կայանալու է դեկտեմբերի 3-ին, կամ, նույնիսկ, դեկտեմբերի 7-ին: Այս բացատրությունները, սակայն, համոզիչ չեն անգամ ՀԱԿ կողմնակիցների համար: Առաջին նախագահն, ըստ ամենայնի, չի հավատում սահմանադրական փոփոխությունների գործընթացի տապալման հեռանկարին ու չի ուզում վերջին տարիների իր քաղաքական ձախողումների շարքը լրացնել ևս մեկով: Գուցե Արամ Մանուկյանի՝ ֆեյսբուքահայության պասիվությանը վերաբերող դիտողությունը անուղղակիորեն հասցեագրված է նաև Լևոն Տեր-Պետրոսյանին, քանի որ նրա բացակայությունն այսօրվա հանրահավաքի ամենակարևոր իրադարձությունն էր:

Իշխանության հույսը քարոզչությունը չէ. Սերժ Սարգսյանի թիմը «Այո»-ն ապահովելու է վարչական և ֆինանսական ռեսուրսների հաշվին: Ընդդիմությունը Սերժ Սարգսյանի ծրագրերը կարող էր տապալել միայն հասարակական ակտիվության շնորհիվ: Սակայն մարդիկ չհավատացին, որ «Ոչ»-ը նույնանում է Սարգսյանի իշխանության հեռացման հետ:

Ազատության հրապարակ եկած 1000 մարդը եկել էին արձանագրելու ընդդիմության պարտությունն ու Տեր-Պետրոսյանի բացակայությունը: Դեկտեմբերի 6-ի արդյունքն արդեն կանխորոշված է, սակայն քարոզարշավի մյուս օրերին ևս՝ «Այո-ոչ»-ի յուրաքանչյուր մասնակից «պատվով» կկատարի իր դերը:

Սուրեն Սուրենյանց