Կառավարության անարդյունավետ «ֆեյքերը»

ՀՀ կառավարությունն իր վրա աշխատող մի քանի ֆեյսբուքյան օգտատերերի միջոցով պարբերաբար հանրությանն է ներկայացնում իր գործունեության մասին այն տեղեկությունները, որոնք պետք է, որ ներկայացներ իր պաշտոնական աղբյուրների և լրատվամիջոցների օգնությամբ:

Իհարկե, հասկանալի է, թե ինչու է կառավարությունը դիմում Facebook-ում իրական և «ֆեյք» պրոֆայլներ պահելու խնդրին, քանի որ ոչ պաշտոնական անձանց միջոցով PR անելն ավելի արդյունավետ է: Սակայն կառավարությունը չի հասկանում ամենակարևոր բանը, որ իսկական արդյունավետության համար բացի գեղեցիկ թվերից պետք է նաև տեսանելի արդյունք ունենալ: Քիչ առաջ նույնպես նկատեցի, որ նշված օգտատերերը գրառումներ են տարածում այս տարվա հոկտեմբեր ամսվա տնտեսական ակտիվության ցուցանիշի՝ սեպտեմբերի համեմատ 3,5 տոկոսով աճելու և նախորդ տարվա հոկտեմբերի համեմատ՝ 2,7 տոկոս տնտեսական աճի մասին: Անշուշտ, գեղեցիկ է հնչում, սակայն վստահություն չի ներշնչում, քանի որ չկա տեսանելի արդյունքը: Թվերը չեն լավացնում մարդկանց կյանքը:

Այնպես որ, հարգելի կառավարություն, ձեր կազմակերպած PR-ը ամենևին էլ արդյունավետ չէ, դրա փոխարեն փորձեք պարզապես ապահովել տեսանելի արդյունք՝ բնակչության սոցիալական պայմանների բարելավման տեսքով, և այդժամ լրացուցիչ «ֆեյքեր» պահելու կարիք չեք զգա:

Կարեն Վարդանյան