ԲՀԿ-ում տեղյակ չեն կուսակցության որևէ անդամի դանակահարման մասին

«Մենք որևէ տեղեկություն չունենք «Բարգավաճ Հայաստան» կուսակցության որևէ անդամի դանակահարելու մասին»,- Լուրեր.com-ի հետ զրույցում ասաց ԲՀԿ խոսնակ Խաչիկ Գալստյանը` մեկնաբանելով մամուլում տարածված այն լուրերը, որ երեք օր առաջ Արաբկիր վարչական շրջանում տեղի ունեցած ծեծկռտուքի հետևանքով մահացած երիտասարդներից մեկը «Բարգավաճ Հայաստան» կուսակցության անդամ է:

Հիշեցնենք, որ այսօր թերթերից մեկի հրապարակած տեղեկության համաձայն՝ երեկ Արաբկիր վարչական շրջանում ծեծկռտուք է տեղի ունեցել, որի հետևանքով կռվի մասնակից երիտասարդներից մեկը մահացել է: Թերթը պարզել էր, որ մահացածը եղել է «Բարգավաճ Հայաստան» կուսակցության անդամ և առավել հայտնի է «բանջարանոցի Ժորիկ» անունով:

Նշենք նաև, որ լրատվամիջոցներից մեկի հետ զրույցում ԲՀԿ նախընտրական շտաբից հաստատել էին Ժորա Կարապետյանի՝ «Բարգավաճ Հայաստան» կուսակցության ակտիվիստ լինելը:

Այսօր դանակահարության փաստի առթիվ ոստիկանությունը տարածել է հաղորդագրություն, որում մասնավորապես ասված է.

«Ապրիլի 18-ին ոստիկանության Արաբկիրի բաժնում հաղորդում էր ստացվել, որ գիշերը, ժամը 03.30-ի սահմաններում մարմնական վնասվածքներով Միքայելյանի անվան վիրաբուժության ինստիտուտ է տեղափոխվել 29-ամյա Ժորա Կարապետյանը:

Տուժողը հիվանդանոցում հայտնել էր, որ վնասվածքներն ստացել է Կոմիտասի պողոտայի թիվ 56 շենքի մուտքի աստիճաններից վայր ընկնելու հետևանքով:

Հաջորդ օրը, ժամը 16.30-ին, ոստիկանության քրեական հետախուզության գլխավոր վարչության և Արաբկիրի բաժնի ծառայողները, Կարապետյանին ծեծի ենթարկելու կասկածանքով, բերման են ենթարկել 1979 թ. ծնված Սարիբեկ Հարությունյանին:

Պարզվել է, որ նա ապրիլի 18-ին, ժամը 00.05-ի սահմաններում, Արաբկիրի 19-րդ փողոցում ծեծի է ենթարկել Ժորա Կարապետյանին և պատճառել վնասվածք:

Փաստի առթիվ հարուցվել է քրեական գործ ՀՀ քրեական օրենսգքրի 112 հոդվածի հատկանիշներով: Սարիբեկ Հարությունյանը ձերբակալված է:

Ապրիլի 26-ին, ժամը 10.30-ին, Ժորա Կարապետյանը, հիվանդանոցում գիտակցության չգալով, մահացել է:

Նախաքննությունը շարունակվում է»: