Ինչո՞ւ ՊՆ հաղորդագրությունում նշված չեն մահացած զինծառայողների անունները

ՀՀ ՊՆ-ն պաշտոնապես հաստատել է այն լուրեը, որ Տավուշի մարզում զոհվել է 3 զինծառայող: Պաշտոնական հաղորդագրության մեջ, սակայն, չի նշվում զոհված զինծառայողների անունները, ինչպես սովորաբար լինում է: Չի նշված, թե ինչ տիպի, տրամաչափի զենքից է հակառակորդը գնդակոծել զինծառայողներին, թեև այս տեղեկությունը ևս որպես կանոն պաշտոնական հաղորդագրություններում ՊՆ-ն նշում է:

Լուրեր.com-ը զրուցեց ՊՆ քննչական ծառայության սպա Մերի Սարգսյանի հետ՝ պարզելու համար, թե ինչով է պայմանավորված սույն հանգամանքը: Վերջինս ասաց, որ այս պահի դրությամբ պաշտոնական հաղորդագրությունում ինչ գրաված է, դրանից ավել ինքը ոչինչ չի կարող ասել: 

«Այս պահի դրությամբ նախաքննության մարմինն այդքանն է նպատակահարմար գտել հրապարակել, և ես ավելացնելու ոչինչ չունեմ», - նշեց Մերի Սարգսյանը:

Հիշեցնենք, որ ըստ տարածված հաղորդագրության, 27.04.2012թ., ժամը 04:15-ի սահմաններում ՀՀ ՊՆ քննչական ծառայության վեցերորդ կայազորային քննչական բաժնում հաղորդում է ստացվել այն մասին, որ Տավուշի մարզի Այգեպար-Մովսես գյուղերի միջև ընկած ճանապարահատվածում ՀՀ ՊՆ N զորամասի պայմանագրային զինծառայողներից մեկին պատկանող «ՎԱԶ 2107» մակնիշի ավտոմեքենայով երթևեկելիս հրազենային մարմնական վնասվածքներ են ստացել վարորդը և ևս երկու պայմանագրային զինծառայողներ:

Ձեռնարկված միջոցառումներով վերջիններիս կյանքը փրկել հնարավոր չի եղել՝ երկու պայմանագրային զինծառայողներ մահացել են Բերդի զինհոսպիտալ տեղափոխելու ճանապարհին, իսկ մեկը՝ Բերդի զինհոսպիտալում:

Դեպքի վայրի զննության ժամանակ բազմաթիվ հրազենային հետքեր են հայտնաբերվել նաև վերը նշված ավտոմեքենայի վրա:

Փաստի առթիվ ՀՀ ՊՆ քննչական ծառայության վեցերորդ կայազորային քննչական բաժնում ՀՀ քր. օր-ի 104 հոդվածի 2–րդ մասի 1-ին և 6-րդ կետերով հարուցվել է քրեական գործ և կատարվում է նախաքննություն: