Չեմպիոնների լիգայի 6 ռեկորդ, որոնց Մեսսին և Ռոնալդուն դեռևս չեն հասել (լուսանկարներ)

Ժամանակակից ֆուտբոլի առաջատարներից երկուսը՝ Մադրիդի «Ռեալի» ֆուտբոլիստ Կրիշտիանու Ռոնալդուին և կատալոնյան «Բարսելոնայի» հարձակվող Լիոնել Մեսսիին, չնայած Չեմպիոնների լիգայում հեղինակած բազմաթիվ ռեկորդների, ստորև նշված ռեկորդներին հասնել դեռևս չեն կարողացել:

ՉԼ-ի եզրափակիչներում ամենաշատ գոլ հեղինակած ֆուտբոլիստները.

Մինչ այժմ Պորտուգալիայի և Արգենտինայի հավաքականների առաջատարները եվրոպական այս մրցաշարի եզրափակիչներում աչքի են ընկել երկուական անգամ՝ Մեսսին 2009թ-ին և 2011-ին, Ռոնալդուն՝ 2008թ-ին և 2014-ին: 

Ռեկորդը պատկանում է «Արքայական ակումբի լեգենդներին»՝ Ֆերենց Պուշկաշին և Ալֆրեդո Դի Ստեֆանոյին, նրանք երկուսն էլ 7-ական գոլ են հեղինակել ՉԼ-ի եզրափակիչներում:

ՉԼ-ի խմբային փուլում ամենաշատ գոլ հեղինակած ֆուտբոլիստը.

Այս ցուցանիշով ռեկորդակիրը «Ռեալի» մեկ այլ նախկին ֆուտբոլիստ է՝ Ռաուլը (53 գոլ բոլոր մրցաշրջաններում): Մինչ հիմա Մեսսին իր ակտիվում ունի 46 գոլ, նույնքան գնդակ ունի նաև Ռոնալդուն:

Ամենաարագ գոլը.

Դիտարկվող ֆուտբոլիստներից ոչ մեկ ոչ մի մրցաշարում ամենաարագ գոլի հեղինակը չի դարձել: Չեմպիոնների լիգայի ամենաարագ գոլի հեղինակը Մյունխենի «Բավարիայի» նախկին ֆուտբոլիստ Ռոյ Մակայն է, ով 2007թ-ին Մադրիդի «Ռեալի» դարպասը գրավել է մեկնարկային սուլիչից 10,12 վայրկյան անց:

Ներկա պահին այս ցուցանիշով Մեսսիի (2008թ. «Բազելի» դեմ խաղում) և Ռոնալդուի (2013թ. «Յուվենտուսի» դեմ խաղում) ամենալավ արդյունքը խաղի 4-րդ րոպեին խփված գոլերն են:

Ամենաարագ հեթ-տրիկը

Չեմպիոնների լիգայում հեթ-տրիկների քանակով ռեկորդ սահմանած Մեսիին չի պատկանում ամենաարագ հեթ-տրիկի ռեկորդը: Մեսսի ամենաարագ երեք գոլերը մեկ խաղում գրանցվել են 22 րոպեում (2010թ. «Արսենալի» դեմ խաղում):

Արագության ռեկորդակիրը «Լիոնի» նախկին խաղացող Բաֆետիմբի Գոմիսն է, ով 2011թ. Զագրեբի «Դինամոյի» դարպասը երեք անգամ գրավել է 8 րոպեում:

Գոլերի շարք

Ռուդ Վան Նիստելրոյը Չեմպիոնների լիգայի 9 խաղում անընդմեջ կարողացել է գոլ հեղինակել, երբ հանդես էր գալիս «Մանչեսթեր Յունայթեդում»՝ 2002/03 թթ. մրցաշրջանում: Հաջորդող 12 տարվա ընթացքում այս ռեկորդը գերազանցել ոչ մեկին չի հաջողվել: 2013/14 մրցաշրջանում Կրիշտիանու Ռոնալդուն մոտ էր այդ ցուցանիշին՝ 8 արդյունավետ խաղ անընդմեջ:

Մեկ խաղում միջինը գոլերի քանակով լավագույն արդյունքը Մյունխենի «Բավարիայի» նախկին ֆուտբոլիստ Գերդ Մյուլերին է: Գերմանացին գրեթե մեկ խաղում մեկ գոլ է հեղինակել, իսկ ավելի կոնկրետ խաղում միջինը 0,97: Ռոնալդուի միջին ցուցանիշը խաղում 0,69 գոլ է (82 գոլ' 119 խաղում), Մեսսիինը' 0,77 (77 գոլ' 100 խաղում):