«Նեմեց, հեռացիր». Քաշքշուկ ակտիվիստների և ոստիկանների միջև

Առաջին հայկական ճակատ ֆան շարժումը հոկտեմբերի 16-ին պահանջեց ՀՖՖ-ից 3 քայլ` հավաքականում ստեղծված ծայրաստիճան վատ վիճակից դուրս գալու կամ գոնե դեպի առաջ շարժվելու համար: ՀՖՖ-ն այդպես էլ չանդրադարձավ ՖԱՖ-ի պահանջներին:

Նշենք, որ ֆուտբոլասերները և ՖԱՖ-ի անդամները երեք պահանջ էին ներկայացրել̀ բարձրակարգ մարզիչ հավաքականի համար, տարբեր կոնֆլիկտների պատճառով ֆուտբոլիստներին չհրավիրելու հարցի վերանայում և ազգային հավաքականի խաղերի տոմսերի գների իջեցում:

ՀՖՖ-ի կողմից ՖԱՖ-ի պահանջներին չարձագանքելու պատճառով դրվեց անգամ ՀՖՖ-ի նախագահ Ռուբեն Հայրապետյանի հրաժարականի և ՀՖՖ գործկոմի լուծարման պահանջը:

ԼՈւՐԵՐ.com-ի թղթակցի տեղեկացմամբ՝ Արամ Խաչատրյանի արձանի մոտից քիչ առաջ մեկնարկեց ՖԱՖ-ի կազմակերպած հրաժականների պահանջի երթը:

Մասնակիցներից մեկը հայտարարել է, որ թեպետ պահանջի երթ է, բայց այն կրելու է խաղաղ բնույթ:

Ֆուտբոլասերները բացականչում են ̀ «Նեմեց, հեռացիր», «Ֆուտբոլ ենք ուզում» և կատարում ազգային ազատագրական երգեր:

20.00

Թեպետ ակցիան ավարտվեց, բայց այն կրելու է շարունակական բնույթ: Հայտարարվեց, որ նորից են հավաքվելու՝ Ռուբեն Հայրապետյանի և գործկոմի հրաժարականի պահանջով: «Գիտակցում ենք' ինչի դեմ ենք դուրս եկել: Սկսում ենք երկար գործընթաց, մինչև ֆուտբոլի ֆեդերացիայի նախագահի և գործկոմի անդամների հրաժարականը, մինչև ֆուտբոլի բարելավումը, մինչև  հավաքականի ֆուտբոլիստը հաճույքով գա հավաքական»,- ասաց Սերգեյ Ջանջոյանը:

19.40

Որպես նախկին ֆուտբոլիստ և որպես ՀՀ քաղաքացի ելույթ ունեցավ ակտիվիստ Արշակ Մուսախանյանը: Նա նշեց, որ «Չեք անցկացնի» նախաձեռնությունն աջակցում է այս շարժմանը: «Մինչև Ռուբեն Հայրապետյանը ֆեդերացիայից դուրս չգա, ֆուտբոլը հաջողություն չի ունենա»,- ասաց Մուսախանյանը:

19.30

Այս պահին լարված իրավիճակ է ստեղծվել ՀՖՖ-ի շենքի դիմաց, ոստիկանների և երթի մասնակիցների միջև քաշքշուկ է սկսվել: Երկրպագուները ցանկանում են «Your time has come»  գրառմամբ պաստառն ամրացնել շենքի դիմացի ճաղերին, սակայն ոստիկանությունը թույլ չի տալիս: 

Մասնակիցները բացականչում են. «Ամոթ, ամոթ», «Նեմեց, հեռացիր»:

19.20

Ակցիայի մասնակիցներն այս պահին ՀՖՖ-ի շենքի մոտ են: Նրանք ցանկանում են ֆեդերացիայի շենքի ճաղերին պաստառ ամրացնել, սակայն ոստիկանները ակտիվիստներին թույլ չեն տալիս: 

18.55

Երթին օգտագործեցին պայթուցիկներ: Ոստիկանությունը հայտարարեց, որ չի հանդուրժի դրանց օգտագործումը: