Խաբեությամբ հափշտակել է 327 000 դրամ

ՀՀ գլխավոր դատախազության ՀՀ ազգային անվտանգության մարմիններում քննվող եւ կիբերհանցագործությունների գործերով վարչությունում հարուցվել է քրեական գործ՝ համակարգչային տեխնիկայի օգտագործմամբ հափշտակություն կատարելու դեպքի առթիվ:
ՀՀ ոստիկանության Սիսիանի բաժնում 2012թ. մարտի 29-ին Սիսիան քաղաքի բնակչուհի Ն. Մ.-ն հաղորդում է տվել այն մասին, որ «Одноклассники» սոցիալական կայքի միջոցով ծանոթացել է ոմն Հարութի հետ, ով խաբեությամբ իրենից հափշտակել է 327 000 դրամ գումար:

Հաղորդման հիման վրա նախապատրաստված նյութերով պարզվել է, որ ոմն Հարութի անվան տակ հանդես եկած անձը, Ն. Մ.-ի հետ գտնվելով էլեկտրոնային նամակագրական կապի մեջ, նրա հետ ստեղծելով կեղծ մտերմիկ հարաբերություններ, դրանով իսկ վստահությունը չարաշահելու եղանակով, վերջինիցս պահանջել է «Վիվա Սել ՄՏՍ» բջջային հեռախոսի լիցքավորման 20 քարտ՝ ձեւացնելով, որ դրանք պետք է տա քրեակատարողական հիմնարկի ղեկավարներից մեկին, որպեսզի իրեն չտեղափոխեն պատժախուց:

Ն. Մ.-ն, տեղի տալով կեղծ հորդորներին ու խաբեությանը, մարտի 26-ին գնել է 20 հատ 1.000-ական դրամ արժողությամբ «Վիվա Սել ՄՏՍ» բջջային հեռախոսի լիցքավորման քարտ, որոնց թվերը «Одноклассники» սոցիալական կայքի՝ իր անհատական էջով հաղորդագրության միջոցով ուղարկել է նրա հասցեին:

Այնուհետև, քրեակատարողական հիմնարկից պայմանական վաղաժամկետ ազատվելու հարցը լուծելու պատրվակով, Ն. Մ.-ի վստահությունը չարաշահելով, վերադարձնելու պայմանով, 2012թ. մարտի 27-ին պահանջել է 1000 ԱՄՆ դոլար, ինչից ելնելով՝ վերջինիս մայրը Սիսիանի «ՎՏԲ» բանկի միջոցով 170.000 ՀՀ դրամ գումար է փոխանցել երեւանաբնակ ընկերուհուն՝ Ռ. Հ.-ին, որն էլ բանկից ստանալով այն՝ փոխանցել է ոմն Հարութի կողմից ուղարկված, դեռեւս ինքնությունը չպարզված անձին:

Բացի այդ, նույն օրը Հարութի անվամբ հանդես եկած վերոհիշյալ անձը, չարաշահելով Ն. Մ.-ի վստահությունը, վերադարձնելու պայմանով պահանջել է իր բջջային հեռախոսահամարների հաշվին փոխանցել 137.000 ՀՀ դրամ գումար: Վերջինս գրավադրված մատանու դիմաց ստացած գումարից «Վիվա Սել ՄՏՍ» ՓԲԸ-ի՝ Սիսիանի գրասենյակից մաս-մաս նրան է փոխանցել պահանջված գումարը:

Դեպքի առթիվ հարուցվել է քրեական գործ ՀՀ քրեական օրենսգրքի 181-րդ հոդվածի 1-ին մասով: Քրեական գործն ուղարկվել է ՀՀ ԿԱ ոստիկանության ՔԳՎ ՀԿԳ քննության վարչություն՝ նախաքննություն կատարելու համար: