Սահմանին ծառայում են Արցախի նախագահի, անվտանգության ծառայության ղեկավարի որդիները. ոտնձգության դեպքում թշնամին մեկին՝ տասը կստանա. Մանվել Գրիգորյան. Shamshyan.com

Հայաստանի, Արցախի իշխանական էլիտան ևս գիտակցում է, որ հայրենիքի առջև պարտքը կատարելը բոլորին է վերաբերում: Հենց այդ պատճառով էլ մեր բանակում ոգին առավել ամուր է, մեր բանակն առավել մարտունակ է, քան Ադրբեջանինը, ուր խայտառակ բարքեր են: Այս մասին SHAMSHYAN.com-ի թղթակցի հետ զրույցում ասաց ԵԿՄ վարչության նախագահ, Արցախի հերոս, զորավար, ԱԺ պատգամավոր Մանվել Գրիգորյանը: Սահմանին տիրող և այլ հարցերի շուրջ նրա հետ մեր զրույցը ներկայացնում ենք ստորև.

-Պարո´ն Գրիգորյան, մինչև սահմանին տիրող իրավիճակին անցնելը խոսենք սպասվելիք իրադարձությունների մասին: Դեկտեմբերի 6-ին սահմանադրական հանրաքվեի վերաբերյալ Երկրապահի դիրքորոշումը ինչպիսի՞ն է լինելու:

-Երկրապահը պետության հիմնասյուներից է: Մենք մասնակցել ենք և՛ Արցախի, և՛ Հայաստանի սահմանամերձ բնակավայրերի պաշտպանությանն ու ազատագրմանը, անմիջականորեն մասնակցել ենք և Հայաստան պետության կայացմանը: Երկրապահն այն մարդն է, որ կանգնած է հայոց պետականության ակունքներում, ուրեմն և չենք կարող անտարբեր լինել պետության համար վճռական նշանակություն ունեցող հարցերում: Ամբողջ երկրապահական եռասերունդ ընտանիքը միանշանակ «այո´» է ասում ՀՀ նախագահ, Զինված ուժերի գերագույն գլխավոր հրամանատար Սերժ Սարգսյանի նախաձեռնած բարեփոխումներին: Դեկտեմբերի 6-ին Սահմանադրության փոփոխությունների օգտին քվեարկելու են ավագ սերնդի երկրապահները, երիտասարդ երկրապահներն ու պատանի երկրապահների ծնողները: Ի դեպ, Հանրապետական կուսակցության հետ Երկրապահի համագործակցությունը խորն արմատներ ունի: Հանրապետականի բոլոր ղեկավարներն էլ երկրապահ են եղել: Աշոտ Նավասարդյանը երկրապահ էր, մեր Սպարապետ Վազգեն Սարգսյանը Երկրապահի հիմնադիրն է և հավերժ նախագահը: Երկրապահ էր Անդրանիկ Մարգարյանը: Ուղնուծուծով, ապրած կյանքով, ողջ էությամբ երկրապահ է նաև ՀՀԿ այսօրվա ղեկավար, Հանրապետության նախագահ Սերժ Սարգսյանը: Ես Սերժ Սարգսյանին ճանաչել եմ դեռ 1989-ից, երբ նա դեռ շարքային էր: Ես դեռ այն օրերից եմ տեսել այդ մարդու նվիրվածությունը հայ ազգին, Արցախին, անկախ պետականությանը: Սերժ Սարգսյանն անցել է պատերազմական թոհուբոհով, անցել է ամեն ինչի միջով, պատվով ղեկավարել է կարևորագույն ոլորտներ' բոլոր ուժային գերատեսչությունները, նաև եղել է Հայաստանի տնտեսության պատասխանատուն: Այս ամենը տեսնելուց, ծանրութեթև անելուց հետո է նա եկել եզրահանգման, թե սահմանադրական որ կարգն առավել արդյունավետ կլինի Հայաստանում: Երկրապահները անվերապահորեն վստահում են իրենց մարտական ընկերոջը: Մենք մեր վերջին համագումարների բանաձևերում հայտարարել ենք, որ աջակցում ենք նախագահ Սերժ Սարգսյանի բոլոր հայրենանվեր ձեռնարկներին: Այսօր էլ մեր պարտքն է նախագահին աջակցելը:

- Իսկ կարո՞ղ եք փաստարկել, թե ինչու է անհրաժեշտ կառավարման համակարգի փոփոխությունը: Կան կարծիքներ, որ դա արվում է միայն նրա համար, որպեսզի Սերժ Սարգսյանը շարունակի մնալ ՀՀ ղեկավար:

- Դրանք պարապ մարդկանց խոսակցություններ են: Գուշակություններով զբաղվելու կարիք չկա: Կգա ժամանակը, և Սերժ Սարգսյանը կբարձրաձայնի, թե ինքը որ ոլորտում, ինչ կարգավիճակով պետք է շարունակի ծառայել հայ ազգին, Հայաստանի Հանրապետությանն ու Արցախին: Իսկ Սահմանադրությունը այսօր աշխարհում առկա միտումներին համապատասխանեցնելը մեր երկրի համար պարտադիր է: Չենք կարող հետ մնալ համաշխարհային ժողովրդավարական պրոցեսներից: Այսօր աշխարհն այնպիսին է, որ եթե ներսում ժողովրդավար պետություն չունենանք, չենք կարողանա հասնել համազգային խնդիրների լուծմանը, չենք կարողանա հաջողություններ ունենալ միջազգային ատյաններում: Սահմանադրությունը քաղաքական փաստաթուղթ չէ:

- Ի՞նչ կարծիքի եք հայ-ադրբեջանական սահմանին տիրող իրավիճակի և մեր բանակի մարտունակության մասին:

-Մեր բանակը հզոր է, մարտունակ: Այսօր սահմանին կանգնած է, բոլորիս անվտանգությունը պաշտպանում է անկախության սերունդը: Իմ անվտանգությունը, իմ երեխաների, թոռների անվտանգությունը երաշխավորում են այն երիտասարդները, ովքեր դեռ չէին էլ ծնվել, երբ ես ու մարտական ընկերներս իրենց ծնողների անվտանգությունն էինք երաշխավորում: Հայկական բանակը վստահորեն վերահսկում է սահմանային իրավիճակը: Եթե թուրքերը ոտնձգությունների փորձ անեն, մեկին՝ տաս կստանան' ինչպես և միշտ է եղել: Ես վստահում եմ մեր երիտասարդությանը, վստահում եմ մեր զինված ուժերին՝ շարքայինից մինչև պաշտպանության նախարար, մինչև գերագույն գլխավոր հրամանատար: Ի դեպ, հենց այսօր սահմանային զորամասում ծառայություն են իրականացնում, մարտական հանձնարարություններ են կատարում Արցախի նախագահ Բակո Սահակյանի որդին, Արցախի անվտանգության ծառայության ղեկավարի որդին: Այսինքն' Հայաստանի, Արցախի իշխանական էլիտան ևս գիտակցում է, որ հայրենիքի առջև պարտքը կատարելը բոլորին է վերաբերում: Հենց այդ պատճառով էլ մեր բանակում ոգին առավել ամուր է, մեր բանակն առավել մարտունակ է, քան Ադրբեջանինը, ուր խայտառակ բարքեր են:

- Ֆրանսիայում նոյեմբերի 13-ին տեղի ունեցած ահաբեկչության հեղինակներին Դուք համեմատեցիք Արցախի, Հայաստանի նկատմամբ ոտնձգություններ կատարողների հետ: Ի՞նչ պետք է անենք, որպեսզի աշխարհում բացառվեն նման միջադեպերը:

- Ես հիմա էլ կարող եմ կրկնել, որ ահաբեկիչն ազգություն չունի: Անմեղ մարդկանց սպանողները նույն կենդանին են' լինեն նրանք թուրք ազերի, արաբ, թե մեկ այլ ազգի ներկայացուցիչ: Աշխարհում կան հզոր, գիգանտ պետությունների ղեկավարներ' տաղանդավոր մարդիկ: Իմ ցանկությունն է, որ աշխարհի հզորները ոչ թե կարապի, խեցգետնի և գայլաձկան նման ամեն մեկն իր կողմը քաշեն, այլ համագործակցեն հանուն համաշխարհային անվտանգության համակարգի կայացման: Չի կարելի, որ աշխարհը ղեկավարվի Աթաբեկ Խնկոյանի բնորոշած «Ուժեղի մոտ միշտ էլ թույլն է մեղավոր» սկզբունքով: Պետք է բոլոր պետությունների ղեկավարները համագործակցեն հանուն արդար աշխարհակարգի ստեղծման: Թե չէ' որ տան հայրը խռով է լինում, միշտ էլ ընտանիքի անդամներն են տուժում: 

Շարունակությունը՝ սկզբնաղբյուր կայքում