ՌԴ-ի միակ հավատարիմ դաշնակիցը Հայաստանն է. Ժիրինովսկի (տեսանյութ)

ՌԴ-ի միակ դաշնակիցը տարածաշրջանում Հայաստանն է: Հայերը կարող են զենքով գնալ ուղիղ դեպի Թուրքիա ու հասնել մինչև Ստամբուլ։ Այս մասին ռուսական Առաջին ալիքի «Политика с Петром Толстым» հաղորդման եթերում հայտարարել է Ռուսաստանի Լիբերալ-դեմոկրատական կուսակցության առաջնորդ Վլադիմիր Ժիրինովսկին:

«Այստեղ հնչել է, որ հավատարիմ դաշնակիցներ են Իրանը, Սիրիան, Հորդանանը։ Հորդանանը փոքր արաբական թագավորություն է, որն ընդհանրապես գոյություն չուներ մինչև Երկրորդ համաշխարհային պատերազմը, ընդունակ չէր ոչ մի բանի: Ի՞նչ դաշնակից: Իրանը հզոր պետություն է... հենց մենք թույլ տվեցինք ՄԱԿ-ին երկարաձգել Իրանի դեմ պատժամիջոցները, Թեհրանի երիտասարդությունը դուրս եկավ փողոցներ՝ «Մա՛հ Ռուսաստանին» կարգախոսներով: Դա ի՞նչ է, դաշնակի՞ց է: Մտածո՞ւմ եք, երբ խոսում եք: Այդ տարածաշրջանում միակ հավատարիմ դաշնակիցը, ով կկատարի այն ամենն, ինչ մենք ցանկանանք, Հայաստանն է։ Այ նրանք կանեն ամեն ինչ, միայն ասեք նրանց»,- ասել է Ժիրինովսկին։

Ի պատասխան դահլիճից հնչած կարծիքին, թե հայերը ոչինչ չեն կարող անել, քաղաքական գործիչը պատասխանել է. «Ինչո՞ւ չեն կարող: Զենք տվեք նրանց»:

Հարցին, թե ուր գնան հայերը զենքով, Ժիրինովսկին պատասխանել է. «Ուղիղ դեպի Թուրքիայի սահման: Թուրքական սահման, նրանք արդեն գնացել են և Թուրքիայի կեսը գրավել են, բոլշևիկները խանգարեցին, Լենինը զենքը տվեց Աթաթուրքին, զենքը պետք էր տալ հայերին»,- ընդգծել է Ժիրինովսկին և պատասխանելով հաղորդման մասնակիցներից մեկի խոսքին՝ ասել. «Ուրիշի ձեռքերով, բայց ոչ քրդերի, քրդերն ունակ չեն: Հայերն ամեն ինչ կանեն, միայն նրանց պետք է ասել՝ իրավունք ունեք, մենք ձեր թիկունքին կանգնած ենք, ինչպես Ամերիկան և Իսրայելը՝ Թուրքիայի, մենք Հայաստանի թիկունքին կանգնած ենք, և Հայաստանը քրդերի հետ կհասնի մինչև Ստամբուլ»,- ասել է նա: