ՕԵԿ-ական թեկնածուի «մարդը» սպառնացել է հաշվեհարդար տեսնել Վարդան Ջհանգիրյանի ներկայացուցիչ Վահե Հովսեփյանի նկատմամբ

Հայ Ազգային Կոնգրեսի ներկայացուցիչ, թիվ 23 ընտրատարածքում մեծամասնական ընտրակարգով առաջադրված թեկնածու Վարդան Ջհանգիրյանի նախընտրական շտաբը դիմում-բողոք էր ներկայացրել թիվ 23 ԸԸՀ ՕԵԿ կողմից առաջադրված թեկնածու Կարեն Բոթոյանի կողմից նախըտրական քարոզչության սահմանված կարգի խախտումների վերաբերյալ, ինչից հետո այսօր Վարդան Ջհանգիրյանի փաստաբան Վահե Հովսեփյանին է զանգահարել Բոթոյանի լիազոր-ներկայացուցիչը, որը նախ հետաքրքրվել է, թե ինչ դիմում-բողոք է ներկայացվել իրենց դեմ, ապա հեռախոսը փոխանցել է մեկ այլ անձի՝ «Եվրոպայի Սերգեյ», որը սպառնալիքներ է տեղացել Վահե Հովսեփյանի հասցեին:

«Այդ անձը նախ հարցրեց, թե որտեղ եմ ես բնակվում: Ես ասացի, որ ապրում եմ Երևանում: Դրանից հետո նա սպառնալիքներ հնչեցրեց իմ հասցեին՝ ասելով, թե ինչպե՞ս եմ ես պատկերացնում իմ հետագա կյանքը Երևանում՝ դիմում-բողոք ներկայացնելուց հետո, ինչին հաջորդեց ինձ ուղղված հայհոյանքների տարափը: Քանի որ իմ կողքին մարդիկ կային, ես ուղղակի անջատեցի հեռախոսը», - Լուրեր.com-ի հետ զրույցում տեղի ունեցածը ներկայացրեց Վահե Հովսեփյանը:

Հիշեցնենք, որ թիվ 23 ընտրատարածքում բացի Վարդան Ջհանգիրյանից և Կարեն Բոթոյանից առաջադրված են նաև Էդուարդ Սահակյանը (ԲՀԿ) և ինքնաառաջադրված, անկուսակցական Սիմոնյան Սմբաթը: 

Այդ ընտրատարածքում իշխող Հանրապետական կուսակցությունը սատարում է ՕԵԿ թեկնածու Կարեն Բոթոյանին: