Գեղարքունիքի մարզի մի քանի քաղաք առաջիկայում կունենա արդիականացված բժշկական կենտրոն

Մոտակա տարիներին Գեղարքունիքի մարզի Սևան, Մարտունի և Վարդենիս քաղաքները կունենան ժամանակակից բժշկական սարքավորումներով հագեցած արդիական բժշկական կենտրոններ: Այս մասին Ճամբարակի առողջության կենտրոնի բացման արարողության ժամանակ իր ելույթում հայտնեց ՀՀ առողջապահության նախարար Արմեն Մուրադյանը: «Ճամբարակի առողջության կենտրոնը երկրորդ բուժհաստատությունն է Գեղարքունիքի մարզում, որը հիմնանորոգվում և արդիականացվում է Գավառ քաղաքի բժշկական կենտրոնից հետո: Հավաստիացնում եմ, որ այժմ ընթացքի մեջ են Սևան, Մարտունի քաղաքների բժշկական կենտրոնների և Վարդենիսի հիվանդանոցի արդիականացման հետ կապված նախագծման աշխատանքները: Մոտակա տարիների ընթացքում այս երեք քաղաքները ևս կունենան ժամանակակից բուժսարքավորումներով հագեցած բժշկական կենտրոններ»,- նշեց Արմեն Մուրադյանը:

Նախարարը հույս հայտնեց նաև, որ Ճամբարակի նորաբաց առողջության կենտրոնում ներդրված բժշկական բարձրորակ ծառայությունները կնպաստեն, որպեսզի պատշաճ բուժում ստանալու համար ճամբարակցիները այն ստանան տեղում, այլ ոչ թե դիմեն մայրաքաղաքի բուժհաստատությունների օգնությանը: Արմեն Մուրադյանը բարձր գնահատեց նաև Ճամբարակի առողջության կենտրոնի արդիականացման ծրագրին մասնակցած տեղական և միջազգային կազմակերպությունների համագործակցված աշխատանքը: «Ծրագրի իրականացումը միջազգային և տեղական կազմակերպությունների համագործակցության փայլուն օրին ակ է: Ծրագրի իրականացմանը մասնակցել են ՀՀ առողջապահության նախարարության ծրագրերի իրականացման գրասենյակը, Համաշխարհային բանկը, Հայաստանի տարածքային զարգացման հիմնադրամը, World Vision հայաստանյան կազմակերպությունը և ՀՀ-ում Ճապոնիայի դեսպանատունը, որոնց համագործակցությունը ստացվել է արդյունավետ»,- ամփոփեց նախարարը:

Գեղարքունիքի մարզի Ճամբարակ համայնքում առողջության կենտրոնի բացման հանդիսավոր արարողությանը մասնակցել է նաև ՀՀ նախագահ Սերժ Սարգսյանը, ով աշխատանքային այցով գտնվում է Գեղարքունիքի մարզում: