Մեր առաջ խնդիր էր դրված պահպանել օլիմպիական 2 վարկանիշը, և մենք կատարեցինք այդ. Արտաշես Ներսիսյան

Ծանրամարտի Հայաստանի կանանց հավաքականի գլխավոր մարզիչ Արտաշես Ներսիսյանի կարծիքով՝ կանանց հավաքականը կատարեց իր առջև դրված խնդիրը. Ռիոյի Օլիմպիական խաղերին թիմը կմասնակցի 2 ծանրորդով: 

«Մեր առաջ խնդիր էր դրված անցած տարվա մեր երկու վարկանիշը պահպանել և մենք կատարեցին այդ հանձնարարությունը: Առաջնությունը շատ ծանր ստացվեց մեզ համար: Նմանատիպ ուժեղ առաջնություն ես դեռ չէի տեսել, իսկապես շատ ծանր էր, բայց մենք կարողացանք պահպանել օլիմպիական մեր երկու ուղեգրերը: Հիմա հանգիստ կարող եմ ասել, որ աղջիկների հավաքականը երկու ծանրորդով կմասնակցի Ռիոյի Օլիմպիական խաղերին: Իսկ ինչ վերաբերում է Օլիմպիական խաղերում դրական արդյունքներ գրանցելուն, ապա մենք ամեն ինչ կանենք՝ թե՛ մարզիչներս, թե՛ մարզիկները՝ Ռիոյում լավ արդյունքի հասնելու համար»,- Ներսիսյանի խոսքը մեջբերում է ՀԱՕԿ լրատվության բաժինը:

Ծանրամարտի Հայաստանի կանանց հավաքականն աշխարհի առաջնությանը մասնակցում էր 5 մարզիկով: 53կգ քաշային Աննա Գովելյանը զբաղեցրեց 28-րդ տեղը, Իզաբելլա Յայլյանը (58կգ)՝ 15-րդ, Նազիկ Ավդալյանը (69կգ)՝ 14-րդ, Սոնա Պողոսյանը (75 կգ) 21-րդ և Հռիփսիմե Խուրշուդյանը (75+)՝ 14-րդ տեղերը: