ՊՆ-ն առայժմ պաշտոնապես չի հայտնում զոհվածների անունները

Ապրիլի 27-ին` ժամը 04:15-ի սահմաններում, Տավուշի մարզի Այգեպար-Մովսես գյուղերի միջեւ ընկած ճանապարհահատվածում հրազենային մարմնական վնասվածքներ ստացած եւ մահացած «ՎԱԶ-2107»-ի վարորդի եւ երկու պայմանագրային զինծառայողների անունները ՊՆ քննչական ծառայությունն չի հրապարակում՝ նախաքննության շահերից ելնելով: Այս մասին Լուրեր.com-ի հետ զրույցում ասաց ՊՆ քննչական ծառայության սպա Մերի Սարգսյանը. «Մենք պաշտոնապես առայժմ անուններ չենք հայտնում»: Նախնական որևէ վարկած նույնպես ՊՆ քննչական ծառայությունն առայժմ չի հայտնում:

Նշենք նաև, որ ըստ լրատվամիջոցներում տարածված տեղեկությունների` «ՎԱԶ-2107» մակնիշի ավտոմեքենայի ղեկին եղել է 27-ամյա Դավիթ Աբգարյանը, իսկ մնացած ուղեւորները եղել են՝ 25-ամյա Արամ Եղսայանը եւ 21-ամյա Արշակը: Ըստ մամուլի հրապարակումների` վերջիններս պաշտպանվելու հնարավորություն չեն ունեցել, քանի որ իրենց մոտ զենք չի եղել: Այս մասին Մերի Սարգսյանը նույնպես ոչինչ չասեց` նշելով, որ դրանք նախաքննության գաղտնիության հետ կապված հարցեր են և այս պահի դրությամբ իրենք այդ հարցերին պարզապես չեն պատասխանում: 

Հիշեցնենք, որ ապրիլի 27-ին` ժամը 04:15-ի սահմաններում ՀՀ ՊՆ քննչական ծառայության վեցերորդ կայազորային քննչական բաժնում հաղորդում է ստացվել այն մասին, որ Տավուշի մարզի Այգեպար-Մովսես գյուղերի միջև ընկած ճանապարահատվածում ՀՀ ՊՆ N զորամասի պայմանագրային զինծառայողներից մեկին պատկանող «ՎԱԶ 2107» մակնիշի ավտոմեքենայով երթևեկելիս հրազենային մարմնական վնասվածքներ են ստացել վարորդը և ևս երկու պայմանագրային զինծառայողներ:

Ձեռնարկված միջոցառումներով վերջիններիս կյանքը փրկել հնարավոր չի եղել՝ երկու պայմանագրային զինծառայողներ մահացել են Բերդի զինհոսպիտալ տեղափոխելու ճանապարհին, իսկ մեկը՝ Բերդի զինհոսպիտալում:

Դեպքի վայրի զննության ժամանակ բազմաթիվ հրազենային հետքեր են հայտնաբերվել նաև վերը նշված ավտոմեքենայի վրա:

Փաստի առթիվ ՀՀ ՊՆ քննչական ծառայության վեցերորդ կայազորային քննչական բաժնում ՀՀ քր. օր-ի 104 հոդվածի 2–րդ մասի 1-ին և 6-րդ կետերով հարուցվել է քրեական գործ և կատարվում է նախաքննություն: