Նոր մանրամասներ փետրվարյան դեպքերից

«Հրապարակ» օրաթերթը գրում է.

«Ժիրայր Սեֆիլյանենց պայքարի և ՀԱԿ-ի կողմից դրան բավականին զգուշավոր մոտեցման ֆոնին նոր մանրամասներ են ի հայտ գալիս՝ այս տարվա փետրվարյան դեպքերին առնչվող, երբ ՀԱԿ-ը կրկին ոչ միայն զգուշավոր, այլև խիստ բացահայտ հայտարարել էր, որ դա իր խաղը չէ, երբ եռյակով' Լևոն Տեր-Պետրոսյանը, Րաֆֆի Հովհաննիսյանն իրենց թիմերով' Լևոն Զուրաբյան, Արամ Մանուկյան, Ռազմիկ Պետրոսյան, Արմեն Մարտիրոսյան, Վարդան Օսկանյան, հանդիպել էին ԲՀԿ առաջնորդին վերջինիս Առինջի «օֆիսում», Սերժ Սարգսյանի' ՀՀԿ խորհրդի նիստում Գագիկ Ծառուկյանի մասին հնչեցրած հայտնի ելույթից հետո' քննարկելու իրենց հետագա քայլերը: Նախ Լևոն Տեր-Պետրոսյանն էր ասել, որ իրենք չեն պատրաստվում չարտոնված գործընթացների մասնակից լինել, ապա նույն միտքը երկրորդել էր Րաֆֆի Հովհաննիսյանը, քանզի փետրվարի 20-ի «հուժկու» հանրահավաքը Երևանի քաղաքապետարանը չէր արտոնել: Միայնակ մնացած Գագիկ Ծառուկյանը ձայն չէր հանել։ «Հաջորդ օրը նա կարդաց իր հայտնի հայտարարությունը' խաղից դուրս գալու մասին, չնայած ես հաստատապես այն կարծիքին եմ, որ և Տեր-Պետրոսյանը, և Րաֆֆին, և այլք չէին ցանկանա, որ նա դա աներ, ուզում էին շագանակները նրա ձեռքով կրակից հանել, որովհետև մտածում էին, որ պարտիան անչափ հեռու էր գնացել, և Գագոն պետք է «ադին նա ադին» մնա Սերժի հետ. Գագոն խելամիտ գտնվեց, ինքը նրանց ֆուկ արեց»,- պատմեց ՀԱԿ մեր աղբյուրը»: