Օդերևութաբանները վարորդներին կոչ են անում դեկտեմբերի 3-ին զերծ մնալ մարզեր և հատկապես լեռնային շրջաններ ուղևորվելուց

Օդերևութաբանները վարորդներին կոչ են անում դեկտեմբերի 3-ին զերծ մնալ մարզեր և հատկապես լեռնային շրջաններ ուղևորվելուց. հանրապետություն ներթափանցող սառը ցիկլոնն իր հետ կբերի մերկասառույց, ձյուն և ջերմաստիճանի կտրուկ նվազում: Այս մասին լրագրողների հետ հանդիպմանն ասաց ՀՀ ՏԿԱԻՆ Հիդրոմետ ծառայության օդերևութաբանության կենտրոնի պետի տեղակալ Գագիկ Սուրենյանը:

«Սկանդինավիայի շրջաններից հանրապետությանը մոտենում է ցուրտ մթնոլորտային ճակատ, որը ներկա պահին գտնվում է Սև ծովի շրջանում և տեղափոխվում է դեպի հարավ-արևելք՝ Կովկաս: Ցուրտ ցիկլոնի ազդեցությունը ցածր ջերմաստիճանի և ձյան տեսքով արդեն կզգացվի մոտակա երեկո: Տեղումները կսկսվեն Շիրակում, Լոռիում և Տավուշում: Իսկ արդեն առաջիկա գիշերը հանրապետության ողջ տարածքը կգտնվի մթնոլորտային ճակատի ազդեցության ներքո»,- «Արմենպրես»-ի հաղորդմամբ ասաց Գագիկ Սուրենյանը:

Հիդրոմետ ծառայության օդերևութաբանության կենտրոնի պետի տեղակալը նկատեց, որ դեկտեմբերի 2-3-ի գիշերը և դեկտեմբերի 3-ի ցերեկը ցիկլոնի ազդեցության հետևանքով հանրապետության ողջ տարածքում կդիտվի ձյան առատ տեղումներ: Տեղումները չեն դադարի մինչև դեկտեմբերի 4-ի գիշերը, սակայն կշարունակվեն միայն Վայոց ձորի և Սյունիքի մարզերում:

«Ձյան տեղումները կդիտվեն քամու ուժգնությամբ, լեռնային շրջաններում կդիտվի բուք: Առանձին հատվածներում քամու արագությունը կկազմի մինչև 20-25կմ/ժ: Տեղումների ինտենսիվության գագաթնակետը կդիտվի դեկտեմբերի 3-ին, որից հետո կսկսեն թուլանալ»,- ասաց Գագիկ Սուրենյանը:

Հիշեցնելով, որ մթնոլորտային ճակատը գալիս է Սկանդինավիայից, ՀՀ ՏԿԱԻՆ Հիդրոմետ ծառայության օդերևութաբանության կենտրոնի պետի տեղակալը նկատեց, որ գալիք գիշերային ջերմաստիճանը կլինի համեմատաբար ցածր, սակայն լուսաբացից կբարձրանա: Օդի ջերմաստիճանը դեկտեմբերի 3-6-ը աստիճանաբար կնվազի 10-12 աստիճանով: Դեկտեմբերի 3-ի ցերեկը օդի ջերմաստիճանը կտատանվի 0 +2C, իսկ գիշերային ջերմաստիճանները զգալիորեն կնվազեն մինչև -6 -8C: Ամենացածր ջերմաստիճանները կգրանցվեն Շիրակի մարզում, Կոտայքի, Գեղարքունիքի, Արագածոտնի, Վայոց Ձորի լեռնային հատվածներում: