Առանց կեղծիքների ընտրություններ Հայաստանում չի պատկերացնում

ՀՀ Կառավարության աշխատակազմի ղեկավար-նախարար Դավիթ Հարությունյանն Ա1+-ի հաղորդման ժամանակ անդրադառնալով «Այո»-ի հաղթանակի դեպքում իշխանությունների վերարտադրման հնարավորությունների մասին խոսակցություններին՝ նշել է, որ Սերժ Սարգսյանը և ՀՀԿ-ն նույն հաջողությամբ կարող են վերարտադրվել «Ոչ»-ի հաղթանակի դեպքում՝ գործող սահմանադրությամբ: Այդ դեպքում, ըստ Դավիթ Հարությունյանի՝ իշխանությունը կրկին կունենա մեծամասնություն խորհրդարանում և անկախ նրանից, թե ով կլինի նախագահը՝ ՀՀԿ-ական մեծամասնություն ունեցող խորհրդարանն անմիջապես կարող է վերցնել այն բոլոր լծակները, որ կան նախագահի ձեռքում և տեղափոխել վարչապետի դաշտ, Սերժ Սարգսյանն էլ դառնա վարչապետ:

Իհարկե, պետք է նշեմ, որ իշխանությունների վերարտադրվելու պահով Դավիթ Հարությունյանի հետ դժվար է չհամաձայնվելը, քանի որ իսկապես ՀՀԿ-ն նույն հաջողությամբ կարող է վերարտադրվել նաև գործող սահմանադրությամբ և միայն այդ պատճառով նոր սահմանադրությանը դեմ լինելը ես բավարար հիմք չեմ համարում: Սակայն այստեղ կա ևս մի հանգամանք՝ ինչու՞ Դավիթ Հարությունյանը քննարկում է միայն այն տարբերակները, երբ ՀՀԿ-ն խորհրդարանում մեծամասնություն է, իսկ հնարավոր չի՞, որ մեծամասնություն չլինի, և այդ դեպքում նաև նոր սահմանադրությամբ ՀՀԿ-ի և Սերժ Սարգսյանի վերարտադրությունը բացառվի: Ստացվում է, որ Դավիթ Հարությունյանը մյուս տարբերակները չի դիտարկում և առանց կեղծիքների ընտրություններ Հայաստանում պարզապես չի պատկերացնում:

Կարեն Վարդանյան