Պենտագոնը ժխտում է ԻՊ-ի հետ Թուրքիայի համագործակցության մասին ենթադրությունները

ԱՄՆ-ի ռազմական հրամանատարությունը ժխտում է ենթադրություններն այն մասին, որ Թուրքիան համագործակցում է «Իսլամական պետություն» ահաբեկչական խմբավորման հետ, այդ թվում' Սիրիայի տարածքից նավթի մաքսանենգության միջոցով:

Ինչպես տեղեկացնում է «Արմենպրես»-ը, վկայակոչելով ՏԱՍՍ-ն, այս մասին դեկտեմբերի 2-ին հայտարարել է ԱՄՆ-ի' Իրաքում և Սիրայում հակաահաբեկչական գործողությանը մասնակցող խմբավորման պաշտոնական ներկայացուցիչ, գնդապետ Սթիվ Ուորենը: Բաղդադից տեսակամուրջի միջոցով նա ճեպազրույց է անցկացրել լրագրողների հետ, որոնք հավաքվել էին Պենտագոնի մամուլի կենտրոնում:

Նրանց խնդրանքով մեկնաբանելով Ռուսաստանի պաշտպանության նախարարության ներկայացուցիչների հայտարարություններն իսլամիստների վերահսկողության տակ գտնվող շրջաններից սիրիական նավթի մաքսանենգությանը Թուրքիայի մասնակցության մասին' Ուորենը նշել է. «Մենք վճռականորեն ժխտում ենք ցանկացած ենթադրություն այն մասին, որ Թուրքիան համագործակցում է ԻՊ խմբավորման հետ: Դա պարզապես ծիծաղելի է: Թուրքիան հակաահաբեկչական կոալիցիայի կազմում է և մասնակցում է ԻՊ-ի դեմ ռազմաօդային գործողությանը»: Նա նաև ընդգծել է, որ «այդ տարածաշրջանում նավթի մաքսանենգությունն ընթանում է տասնամյակներով» և ԱՄՆ-ն կոալիցիայի իր դաշնակիցների հետ կշարունակի ԻՊ-ի այն օբյեկտներին հարվածներ հասցնելը, որոնք օգտագործվում են հումքի անօրինական վաճառքից շահույթ կորզելու համար:

Ավելի վաղ, դեկտեմբերի 2-ին ՌԴ պաշտպանության փոխնախարար Անատոլի Անտոնովը հայտարարել էր, որ Թուրքիայի բարձագույն ղեկավարությունը ներգրավված է սիրիական և իրաքյան նավթի անօրինական արյունահանման և վաճառքի մեջ: «Օրինական տերերից' Սիրիայից և Իրաքից գողացված նավթի հիմնական սպառողը Թուրքիան է: Ըստ ստացված տվյալների'այդ հանցավոր բիզնեսին ներգրավված են երկրի բարձրագույն ղեկավարությունը, Նախագահ Էրդողանը և նրա ընտանիքը: Մենք բազմիցս ասել ենք ահաբեկիչներին սիրաշահելու վտանգավորության մասին»,- նշել է նա:

Թուրքիայի ղեկավարությունը նույնպես ժխտել է այդ մեղադրանքները: