Հանրապետականները Սերժ Սարգսյանին «բոբո» են դարձրել

Վերջին օրերին իշխանության ու ՀՀԿ առնվազն երեք առանցքային գործիչ' վարչապետ Հովիկ Աբրահամյանը, նախարար Դավիթ Հարությունյանը, ԱԺ նախագահ Գալուստ Սահակյանը, ակնարկել են, որ իրենց համար ընդունելի կլինի ցանկացած ընտրություն, որ ժողովուրդը կկատարի հանրաքվեի ժամանակ:

Դավիթ Հարությունյանն ավելի հեռուն է գնացել՝ ասելով, որ եթե «Ոչ»-ի ընտրություն կատարվի, ապա Սերժ Սարգսյանը 2017-ին, հավանաբար, կզբաղեցնի վարչապետի պաշտոնը՝ հենց գործող Սահմանադրությամբ ստանձնելով երկրի գործադիր իշխանության ղեկավարումը' որպես խորհրդարանական մեծամասնության վարչապետ:

Իսկապես գործող Սահմանադրությունը թույլ տալիս է, որպեսզի Սերժ Սարգսյանը վերարտադրի սեփական իշխանությունը՝ խորհրդարանական առաջիկա ընտրություններում ՀՀԿ հաղթանակի դեպքում, եթե նույնիսկ խորհրդարանական մեծամասնությունն ու նախագահը միևնույն քաղաքական ուժը չներկայացնեն:

Ի վերջո, առկա է ռուսական նախադեպը, երբ Վլադիմիր Պուտինը լեգալ ճանապարհով պահպանեց իշխանությունը՝ ստանձնելով վարչապետի պաշտոնը ու նախագահի պաշտոնը փոխանցելով Դմիտրի Մեդվեդևին:

Սակայն Սերժ Սարգսյանը հրաժարվեց այս ճանապարհից՝ օբյեկտիվ ու սուբյեկտիվ պատճառներով:

Նախ, Սարգսյանը չունի հասարակական աջակցության ռեսուրս՝ տեխնոլոգիապես բարդ նման օպերացիա իրականացնելու համար: Երկրորդ, Հայաստանի գործող իշխանությունը չունի քաղաքական այն հեղինակությունը, որպեսզի մեկ տարվա ընթացքում երկու համապետական ընտրություն հաղթի՝ առանց հետընտրական ցնցումների: Ու վերջապես՝ Հայաստանի այս իշխանությունը չունի իր «Մեդվեդևին»՝ խարիզմատիկ գործչին, ով կփոխլրացնի Սարգսյանին:

Ըստ այդմ՝ գործող նախագահը գնաց իշխանության վերարտադրության այլ՝ սահմանադրական փսփոխությունների ճանապարհով: Ի դեպ, իշխանությունը վերարտադրելու Սարգսյանի ցանկությունն ինքնին դատապարտելի չէ, եթե առաջիկա հանրաքվեն ու խորհրդարանական ընտրություններն անցնեն օրինական, այսինքն՝ գործընթացը լինի լեգալ:

Ես չեմ հավատում Դավիթ Հարությունյանի այն հավաստիացմանը, իբրև թե իրենք անտարբեր են «Այո-ոչ» երկընտրանքի հարցում: Սերժ Սարգսյանը գուցե մի օր դառնա վարչապետ, սակայն դա տեղի կունենա խորհրդարանական կառավարման համակարգում ու տեղի կունենա շատ ավելի ուշ, քան 2017-ին:

Սահմանադրական փոփոխությունները քաղաքական առաջնահերթություն են Սերժ Սարգսյանի օրակարգում: Սարգսյանը քարոզարշավի ավարտին անմիջականորեն մասնակցեց քարոզարշավին՝ հեռուստաասուլիսի ձևաչափով:

Իշխանությունն ամեն ինչ՝ օրինական, դժբախտաբար, նաև անօրինական, անելու է՝ դեկտեմբերի 6-ի հանրաքվեում «Այո» ապահովելու համար:

Դավիթ Հարությունյանն իշխանության ծրագիր չի բացահայտում՝ ասելով, թե «Ոչ»-ի դեպքում՝ Սարգսյանը 2017-ին վարչապետ կդառնա: Խորապես համոզված եմ՝ Հանրապետականում նման սցենար չի քննարկվել:

ՀՀԿ-ում պարզապես գիտեն, որ հասարակության շրջանում ցածր է իրենց ու նաև Սարգսյանի վարկանիշը: Ըստ այդմ՝ նախարարը քարոզչական հնարք է կիրառում՝ Սարգսյանի վարչապետության հեռանկարը մատուցելով որպես սպառնալիք, կապում է «Ոչ»-ի հետ՝ գործող նախագահից ազատվելու բաղձանք ունեցողներին փորձելով բերել «Այո»-ի հարթություն:

Մազոխիստական այս մոտեցումն այլընտրանք չունի քաղաքականապես սնանկ այս իշխանության համար:

Սուրեն Սուրենյանց