Ադրբեջանի մամուլը հայտնում է երկու զինծառայողների կորստի մասին

Ադրբեջանական ԶԼՄ-ները հայտնում են պաշտպանության նախարարության ստորաբաժանումների երկու զինծառայողի զոհվելու մասին: Ինչպես հաղորդում է «Արմենպրես»-ը, minval.az կայքը հայտնում է, որ մահացել է Սաաթլըի շրջանի Մոլլավազլը գյուղից զինծառայության զորակոչված զինծառայող, ենթասպա Ֆարիզ Ալիաբբաս օղլու Նովրուզովը: Ֆիզուլիի ուղղությամբ (Մարտունի) տեղակայված դիրքում մահացել է Թովուզի Ահմեդաբադ գյուղից զորակոչված զինծառայող Էլշան Այդըն օղլու Իսմայիլովը:

Ադրբեջանի պաշտպանության նախարարությունը հաստատել է Ֆարիզ Նովրուզովի մահվան փաստը, իսկ մամուլում հրապարակվել է նրա հուղարկավորությունից լուսանկար:

2015 թվականի սկզբից մինչ այժմ Ադրբեջանի պետական կառույցները խոստովանել են 23 զինծառայողների մահը, որոնցից, պաշտոնական տվյալներով, 15-ը զոհվել են մարտական պայմաններում: Ադրբեջանական «Խազար» հետազոտական կենտրոնի տվյալներով' ընթացիկ տարում ադրբեջանական բանակում կորուստը 70 զոհ է եղել, որոնցից 33-ը' մարտական, 37-ը' ոչ մարտական կորուստ:

Թեև Ադրբեջանը շարունակում է սեփական զինուժում գրանցված մահվան դեպքերի ու արտակարգ պատահարների մասին տեղեկությունները թաքցնելու քաղաքականությունը, այդուհանդերձ, ՀՀ ՊՆ և ԼՂՀ ՊԲ կողմից սեփական միջոցներով ձեռք բերված տեղեկությունների, ինչպես նաև ոչ պաշտոնական աղբյուրների և սոցցանցերի հաղորդագրությունների համաձայն' տարվա սկզբից մինչ այժմ ադրբեջանական բանակի կորուստը կազմել է առնվազն 135 զինծառայող և 144-ից ավելի վիրավոր: