Հարսանիքն ու ՀԱԿ հանրահավաքը

Երեկ երեկոյան ՀՀԿ խոսնակ Էդուարդ Շարմազանովն ասում էր, որ միջին վիճակագրական հայկական հարսանիքին ավելի շատ մարդ է մասնակցում, քան ՀԱԿ հանրահավաքին:

Ենթադրվում էր, որ երեկ Ազատության հրապարակում գոնե կարող էր կայանալ ընդդիմության որակական միասնությունը: «Նոր Հայաստանի» ու ՀԱԿ-ի գործիչները նույն հարթակում էին, արտաքուստ ասում էին նույն բանը, սակայն տարբեր լեզուներով:
Եթե վերադառնանք հարսանիքային տերմինաբանությանը, «հարսն» ու «փեսան»‘ Սէֆիլյան-Հովհաննիսյան տանդեմն ու ՀԱԿ-ը, անհաշտ էին, իսկ «քավորը»՝ Լևոն Տեր-Պետրոսյանը, ընդհանրապես բացակա էր:

Տեսականորեն ընդդիմադիր բոլոր ուժերը նույն բանն են ուզում՝ գործող նախագահի ու իշխանության հեռացում: Գործնականում ՀԱԿ-ը, գոնե ինստիտուցիոնալ առումով, նույն այս համակարգի մաս է, ու առնվազն համակարգային «խաղի կանոնները» պահանջում են, որ առաջին նախագահի թիմն այսօր շեշտը դնի ոչ թե հեղափոխականության, այլ 2017-ի խորհրդարանական ընտրություններին նախապատրաստության վրա: Պատահական չէ, որ Լևոն Տեր-Պետրոսյանը երեկ նույնպես բացակա էր հանրահավաքային հարթակից՝ իր կուսակցությանն, ըստ էության, սահմանազատելով Ժիրոյենց չստացված հեղափոխությունից:

Ժիրոյին ոչ ոք «քաղաքական բազարի» չի հրավիրի, մանավանդ եթե հարյուրամյա տարելիցն անցնի, իսկ Սերժ Սարգսյանը շարունակի մտածել իշխանության վերարտադրության մասին՝ նույն այդ իշխանությունը լքելու փոխարեն: Սէֆիլյանի դաշնակից Րաֆֆի Հովհաննիսյանը վաղուց անգամ հարազատ կուսակցությունում լուրջ չի ընկալվում: Գուցե ճիշտ են «չար լեզուները», որոնք պնդում են, թե աղմուկը «Ժառանգության» առաջնորդն օգտագործում է՝ «դրսերից» փող պոկելու համար: Քաղաքականությունը վաղուց «խոպանային» գործունեության է վերածվել «Բարևի հեղափոխության» ռահվիրայի համար:

Եթե հայտնի Կռիլովը կենդանի լիներ, հիանալի նյութ կստանար՝ իր հայտնի առակը վերախմբագրելու համար:

ՀԱԿ-ն ակտիվ «Ոչ» է ասելու տեղամասերում՝ իր ահաբեկված ու գնված հանձնաժողովականներով ապահովելով իշխանության «Այո»-ի հաղթանակը: Ժիրոն «Ոչ» է ասելու Ազատության հրապարակում՝ իր մի քանի տասնյակ համակիրով տարալուծվելով մոտակայքով անցնող հարսանքավորների հոծ բազմության մեջ: Րաֆֆին կպատռի իր քվեաթերթիկը՝ մյուսներից տարբերվելու ու իր արարքին ծիսականություն հաղորդելու համար:

«Այո»-ն հաղթել է իրար հոշոտող «Ոչ»-երի քաղաքական չգոյության ֆոնին, եթե նույնիսկ ոչ վաղ անցյալի «միակ տղամարդը» մնա տանը՝ բոյկոտելով հանրաքվեն:

Հա, ի դեպ, Շարմազանովը մոռացավ ասել, թե ինչո՞ւ է Քոչարյանի «նուրբ հոգին» այդքան խոցվել Սերժ Սարգսյանի վերջին հարցազրույցից: Գուցե նրա համսր տեղ չի գտնվել ոչ իշխանության բազմամարդ, ոչ էլ՝ ընդդիմության սակավամարդ հարսանիքներում...

Սուրեն Սուրենյանց