Սան Բեռնարդինոյում ռումբեր են գտել հրաձիգների տանը

ԱՄՆ-ի Կալիֆոռնիայի նահանգի ոստիկանության ներկայացուցիչները հայտարարել են, որ Սայիդ Ֆարուքի և նրա կնոջ՝ Տաշֆին Մալիքի տանը, որոնք 14 մարդ են սպանել և ավելի քան քսանին վիրավորել Սան Բեռնարդինո քաղաքում, հայտնաբերվել է զինանոց, ներառյալ պայթանյութ և ռումբերի պատրաստման սարքավորում, տարբեր զինատեսակներ և հազարավոր փամփուշտներ, տեղեկացնում է «Արմենպրես»-ը՝ հղում անելով BBC-ին:

Խուզարկությունը կատարվել է մարդասպանների հետապնդումից և փոխհրաձգությունից հետո, որի ընթացքում հարձակվողները գնդակահարվել են:

Իշխանությունները մինչ այժմ չեն հասկանում, թե որոնք են եղել այն սպանդի դրդապատճառները, որը սարքել էին 28-ամյա Սայիդ Ֆարուքը և նրա 27-ամյա կինը: Ոստիկանության ներկայացուցիչների տեղեկությունների համաձայն՝ զույգը պատրաստ էր իրականացնել ևս մեկ հարձակում:

Հետաքննությունների դաշնային բյուրոն նշում է, որ առայժմ վաղ է պատահածը կապել ահաբեկչության հետ, և հարձակման հնարավոր պատճառ է համարում աշխատավայրում ծագած խնդիրները: ԱՄՆ-ի նախագահ Բարաք Օբաման չի բացառել ահաբեկչական գործողության հավանականությունը:

Օբաման կարգադրել է, որ Կալիֆոռնիայի նահանգում տեղի ունեցած ողբերգության կապակցությամբ մինչև դեկտեմբերի 7-ը խոնարհվեն վարչական շենքերի, դեսպանատների և ռազմական հիմնակների դրոշները: Ինչպես նշում են տեղական ԶԼՄ-ները, հղում անելով նախագահի հայտարարությանը, դրոշները խոնարհվում են «Սան Բեռնարդինոյում իրականացված գրոհների զոհերի հիշատակը հարգելու համար»: