Արեգ Կյուրեղյանն ազատության մեջ է

Արեգ Կյուրեղյանն ազատության մեջ է: Այս մասին հայտնում են ՄԻՊ գրասենյակից:

Ազատության հրապարակում շուրջօրյա նստացույցի ընթացքում միջադեպ է տեղի ունեցել և ոստիկանները Հայկ Կյուրեղյանի եղբայր Արեգ Կյուրեղյանին բերման են ենթարկել:

Դեպքի մասին Օմբուդսմենի թեժ գծին տեղեկացրել է «Հիմնադիր խորհրդարանի» անդամ Կարո Եղնուկյանը:

Օմբուդսմենի ներկայացուցիչներն այցելել են ոստիկանության Կենտրոնի բաժին և հանդիպել Արեգ Կյուրեղյանին:

Զրուցել են նաև ոստիկանության Կենտրոնի բաժնի պետի տեղակալի հետ,ով տեղեկացրել է, որ անձնական խուզարկության ընթացքում Կյուրեղյանի մոտ հայտնաբերվել է դանակ և ներկա պահին քննություն է իրականացվում:

Այնուհետև Օմբուդսմենի ներկայացուցիչները տեղեկացրել են Կարո Եղնուկյանին, որ իրականացվող գործողությունների համար Կյուրեղյանին փաստաբան անհրաժեշտ կլինի:

Տեղեկացնենք, որ այս պահին Արեգ Կյուրեղյանն արդեն ազատ է արձակվել և դեպքի կապակցությամբ քննությունը շարունակվում է: