Շիրակի մարզի 8 համայնքում այսօր նաև ՏԻՄ ընտրություններ են

Շիրակի մարզում ըստ նախատեսված ժամանակացույցի բացվել են դեկտեմբեր 6-ին Սահմանադրական փոփոխությունների հանրաքվեի համար նախատեսված բոլոր 220 ընտրական տեղամասերը: Ինչպես տեղեկացրել է Շիրակի մարզպետարանի աշխատակազմի ՏԻ և հանրապետական գործադիր մարմնի հարցերով վարչության տեղական ինքնակառավարման և համայնքային ծառայության հարցերի բաժնի պետ Ռուբեն Հարությունյանը, ժամը 9:50-ի դրությամբ իրենք դեռևս որևէ բողոք կամ ահազանգ չեն ստացել որևէ տեղամասից:

Մարզում գործում է 4 ընտրատարածք. ընտրողների թվով ամենամեծը 34-րդն է, որն ընդգրկում է Գյումրին: Ի դեպ, ընտրողների նախնական ցուցակները փոփոխվել են. ինչպես տեղեկացրեց Ռուբեն Հարությունյանը, նախնական տվյալներով' մարզն ուներ ընդհանուր 231 հազար 821 ընտրող, սակայն այս ընթացքում, փոփոխությունների արդյունքում, այդ թիվը նվազել է. այս պահին ըստ ցուցակների մարզում կա 230 հազար 006 ընտրող:

Բացի այն, որ դեկտեմբերի 6-ին քաղաքացիներն իրենց կողմ կամ դեմ որոշումները կկայացնեն սահմանադրական փոփոխությունների հետ կապված, մարզի 8 համայնքներում անցկացվում են նաև ՏԻՄ ընտրություններ. համայնքներից 3-ում ընտրելու են ավագանու անդամների, մեկում' ավագանի և համայնքի ղեկավար, իսկ մյուսներում' համայնքի ղեկավար: