Հերթական «մենթալիտետային քվեարկությունը»

2003թ-ին Սերժ Սարգսյանը, ով ղեկավարում էր նախագահ Ռոբերտ Քոչարյանի նախընտրական շտաբը, ի պատասխան ընտրական գործըթացին միջազգային դիտորդների տված բացասական գնահատականի՝ ասել էր, որ ընտրությունները համապատասխանել են մեր մենթալիտետին:

«Մենթալիտետային ընտրությունը» մոտավորապես այն է, որ ընտրությունները ձևով համապատասխանում են միջազգային չափանիշներին, իսկ բովանդակությամբ' հարիր են մեր ասիական մենթալիտետին, որը, ցավոք, հեռու է դեմոկրատիայից:

Մոտավորապես այսպիսին էր այսօրվա հանրաքվեն, որին պաշտոնապես մասնակցել է 1.200.000-ից ավելի մարդ' ընտրողների 50,51 տոկոսը:

Սահմանադրական փոփոխությունների բովանդակության հարցում կարող են ու պետք է լինեն տարբեր մոտեցումներ, սակայն հանրաքվեի օրինականության, դրա լեգիտիմության հարցում՝ անհրաժեշտ էր քաղաքական, հանրային կոնսոլիդացիա:

Դա տեղի չունեցավ, որովհետև ՀՀԿ «մեկ քայլ առաջ» գնահատակսնը բախվում է հանրաքվեին ընդդիմության տված «խայտառակություն» բնորոշմանը:

Սահմանադրության, դրա փոփոխությունների դրական էֆեկտը կարող են զրոյանալ, եթե հանրաքվեն ուղեկցվել է կեղծիքներով:

Իսկ դրանք եղել են՝ մի տեսակ ստվերելով այն, ինչը կոչվում է ռեֆորմ:

Սուրեն Սուրենյանց