Ադրբեջանում խռովարար Նարդարանի շրջափակումն ընդլայնվել է

Ադրբեջանի ՆԳՆ ներքին զորքերն ընդլայնել են Բաքվի Նարդարան ավանի շրջափակման գոտին հարևան Բիլգյա և Մաշտաղա ավանների հաշվին:

Ինչպես հաղորդում է «Արմենպրես»-ը' վկայակոչելով «Թուրան» լրատվական գործակալությունը, փողոցների մուտքերում բետոնե մեծ աղյուսներ են դրվել, ստեղծվել են ՆԳՆ արագ արձագանքման գնդի ավտոնատավորների պահակակետեր: Բոլոր անցնող ավտոմեքենաները ստուգվում են, նրանց տերերը' խուզարկվում: Պահակակատերեը գործում են շուրջօրյա: Փաստորեն այդ գոտում արտակարգ դրություն է մտցվել:

Նարդարանում իրավիճակը մնում է անփոփոխ: Բոլոր փողոցները փակվել են: Մինչ այժմ ավանում գազ և էլեկտրաէներգիա չկա: Ավանում լարվածությունը չի ընկնում: Գլխավոր պատճառն այն է, որ իշխանությունները մտադիր են ավանում խիստ կարգ սահմանել և բացառել կրոնական ընդդիմության ուժեղացումը, որի գլխավոր աղբյուրն այսօր Ադրբեջանում դարձել է Նարդարանը:

Ադրբեջանցի շիաների կենտրոն համարվող Նարդարան ավանում նոյեմբերի 26-ին ՆԳՆ կողմից շիա հավատացյալների դեմ իրագործված բռնաճնշումների արդյունքում կալանավորվել են Ադրբեջանի շիաների առաջնորդ Թալե Բաղըրզդեն և ևս 32 հավատացյալներ: Ոստիկանների գործողությունները զայրացրել են Նարդարանի բնակիչներին: Նրանց և ոստիկանության միջև բախումներ են սկսվել: Փոխհրաձգությունների հետևանքով երկու ոստիկան և 5 բնակիչ սպանվել են: Հաջորդ օրերին իսլամիստների և ոստիկանության միջևբախումներ են սկսվել նաև Ադրբեջանի այլ շրջաններում' Գյանջայում, Լենքորան ում և այլ քաղաքներում:

Ադրբեջանի ՆԳՆ-ը և գլխավոր դատախազությունը միջադեպի առնչությամբ հայտարարություն է տարածել, որում ասվում է, որ «ավանի շիա առաջնորդները ծրագրում են բռնությամբ փոխել սահմանադրական կարգը և երկրում շարիաթի նոր օրենքներ մտցնել, ինչի նպատակով նրանք ստեղծել են «Մուսուլմանական միասնություն» անվամբ շարժում, սկսել են իրենց կողմնակիցներ հավաքագրել Բաքվում և երկրի շրջաններում և մատակարարել նրանց զենքով և պայթուցիկ նյութերով, խումբը Նարդարան ավանում անօրինական հավաք է անցկացրել' քննարկելով իշխանությանն անհնազանդության ակցիայի կազմակերպում, թռուցիկներ է բաժանել բնակչությանը և որոշել է պետական չինովնիկների ցուցակը, որոնց դեմ ահաբեկչական գործողություներ էր նախապատրաստվում»:

Բելգիայի Գենթի համալսարանի պրոֆեսոր Բրունո դե Կորդյեն, մեկնաբանելով նարդարանյան իրադարձություններն, ընդգծել է, որ այդ առիթով Ադրբեջանի իշխանութունների նյարդայնությունը պայմանավորված է արաբական գարնան հոգեբանական ազդեցությանբ և Ուկրաինայում իրադարձություններով: «Նրանք անհանգստացած են, որ ինչ որ նման բան կարող է տեղի ունենալ նաև իրենց մոտ», -ընդգծել է բելգիացի պրոֆեսորը: