Հաղթեց Տիմատին

Ո՞վ հաղթեց իրականում երեկ: Ըստ ԿԸՀ-ի հրապարակած տվյալների՝ բնականաբար, «Այո»-ն, ըստ ընդդիմադիրների ֆեյսբուքյան ստատուսների՝ «Ոչ»-ը, սակայն արդյունքները կեղծվեցին, և էլի արդյունքում հաղթեց «Այո»-ն: Եվ ինչպես ամեն անգամ, թե՛ սոցիալական ցանցերում, թե՛ առօրյայում մարդկանց միջև միևնույն զրույցներն են, մեկն ասում է՝ կեղծել են, բոլորը ծախվել են, մյուսն էլ ասում է՝ ամեն ինչ արդար է: Եվ ինչպես ամեն անգամ՝ այս անգամ էլ մի հատված դուրս է գալիս փողոց՝ բողոքելու, պարզապես այս անգամ արդեն գործ ունենք շատ ավելի փոքր հատվածի հետ, որոնց թիվը նույնիսկ հարյուրի չի հասնում: Նրանք բողոքում են, կոչ են անում բնակչությանը՝ միանալ իրենց, բայց ոչ ոք չի միանում: Ոմանք դա փորձում են կապել ցուրտ և անդուր եղանակի հետ. իսկապես որ տհաճ է նման եղանակին փողոց դուրս գալ, մարդիկ կարող են մրսել, հիվանդանալ:

Բայց պարզվում է, որ ամենևին էլ տհաճ չէ՝ նայած թե ինչի համար ես դուրս գալիս: Օրինակ՝ նույն հանրաքվեի օրը մարզահամերգային համալիրում համերգ էր տալիս ռուս երգիչ Տիմատին, և ոչ մի ցուրտ, ոչ մի ձյուն կամ մերկասառույց չխանգարեց հազարավոր քաղաքացիներին դուրս գալ և գնալ համերգի: Եվ սա միակ դեպքը չէ: Հիշու՞մ եք Ցեղասպանության 100-ամյակի կապակցությամբ System of a Down ռոք խմբի համերգը Հանրապետության հրապարակում: Հիշու՞մ եք, թե որքան բազմություն կար հրապարակում: Երբևէ որևէ հանրահավաքին այդքան մարդ եկե՞լ էր: Կամ թեկուզ Քիմ Քարդաշյանի այցը...

Ամեն ինչ շատ պարզ է՝ Հայաստանում քաղաքական գործընթացներն այնքան են արժեզրկվել, իրենց մշտապես կրկնվող բնույթով այնքան են հոգնեցրել, զզվեցրել մարդկանց, որ իրականում մարդկանց մեծ մասը խոշոր հաշվով այսօր թքած ունենա «Այո»-ի վրա էլ, «Ոչ»-ի վրա էլ, իշխանության վրա էլ, ընդդիմության վրա էլ: Նշված կողմերից ոչ մեկը ժողովրդի մեջ չի վայելում ոչ միայն բավարար վստահություն ու հարգանք, այլ նույնիսկ չի առաջացնում բավարար հետաքրքրություն: Իհարկե, նրանք բոլորը կարող են գոռալ, թե ժողովուրդը իրենց հետ է: Բայց ոչ, ժողովուրդը Տիմատիի հետ է, Քիմ Քարդաշյանի հետ է, System of a Down-ի հետ է և կարող է լինել Հայաստան եկած ցանկացած երգչի հետ, նույնիսկ ռաբիզ երգիչ ու վաստակավոր արտիստ Արմենչիկի: Իսկ կոնկրետ երեկ հաղթեց Տիմատին:

Կարեն Վարդանյան