Բաքվում բանվորները պահանջում են վճարել աշխատավարձերը

Ադրբեջանի «Ազերինշաաթ» շինարարական ընկերության աշխատակիցները հերթական անգամ բողոքի ակցիա են անցկացրել' պահանջելով վճարել մայիսից չստացած իրենց աշխատավարձերը:

Ինչպես հաղորդում է «Արմենպրես»-ը' վկայակոչելով ադրբեջանական ԶԼՄ-ները, ընկերության ղեկավարությունը բողոքող բանվորներին հայտարարել է, որ աշխատավարձերի պարտքերը չեն վճարվելու:

«Նրանք ասում են, թե մենք աշխատել ենք անօրինական հիմունքներով, մենք պաշտոնապես իրենց աշխատողները չենք համարվել, եւ այդ պատճառով մեզ աշխատավարձ չի հասնում», -ասել է բանվորներից Հիդայաթ Մամեդովը:

Նրա խոսքով' բանվորները մտադիր են շարունակել բողոքի ակցիան այնքան ժամանակ, քանի դեռ չեն ստանա իրենց վաստակը:

«Մենք ճանապարհներ ենք կառուցել Շամախիում, Լենքորանում, Աստարայում, իսկ այժմ չենք կարողանում ստանալ մեր փողերը: Մենք ընկերության ղեկավարությունից պահանջում ենք վճարել մեզ հասանելիքը», -ասել է նա:

Նախկինում աշխատավարձերի համար բողոքող «Ազերինշաաթ»-ի մի խումբ բանվորների պարտք-աշխատավարձը վճարել էր «Ազերյոլսերվիս» ընկերությունը:

Ադրբեջանում նավթի եւ մանաթի էժանացման հետևանքով սկսված խորը տնտեսական ճգնաժամի պատճառով պետբյուջեի նավթային եկամուտները խիստ նվազել են, ինչի հետ կապված բազմաթիվ պետական եւ մասնավոր հաստատություններ փակվել կամ կանգնել են փակվելու շեմին, հազարավոր աշխատավորներ գործազուրկ են դարձել:

Ադրբեջանի տնտեսական աճն օրեցօր նվազում է, միջազգային վարկանիշային գործակալությունների համաձայն' Ադրբեջանական բանկերը կանգնած են ռիսկի սահմանին, այս տարվա ընթացքում Ադրբեջանն արդեն 8,7 մլրդ դոլար է կորցրել, Ադրբեջանի բյուջեն դեֆիցիտային է դարձել. եկող տարվա բյուջեն անցյալ տարվա պետբյուջեից մոտ 2 անգամ փոքր է սահմանվել: