«Ժողովրդի կամարտահայտումը» միայն Քոչարյանի օրոք էր

Պատկերացնո՞ւմ եք՝ սահմանադրական փոփոխությունների հանրաքվեում տեղի ունեցած կեղծիքներին անդրադարձել է նաև «ընդդիմադիր գործիչ» Ռոբերտ Քոչարյանի գրասենյակը՝ ասելով, որ հանրաքվեն ժողովրդի կամարտահայտումը չէր: Ու պատկերացնո՞ւմ եք՝ նրանք ասել են, որ դեկմտեմբերի 6-ին ամբողջ օրը հետևել են ու տեսել են, թե ինչպես են կուսակցությունները, դիտորդներն ու լրատվամիջոցները կոպիտ խախտումներ արձանագրում՝ «հասարակական ընկալման մեջ հանրաքվեի արդյունքները զրկելով լեգիտիմությունից»:

Մենք, իհարկե, շատ լավ հիշում ենք նախկին «լեգիտիմ» նախագահ Ռոբերտ Քոչարյանի օրոք տեղի ունեցած «թափանցիկ» ու «անաչառ» նախագահական ընտրությունները 1998-ին և 2003-ին, սահմանադրական փոփոխությունների հանրաքվեն 2005-ին, որտեղ ոչ մի լցոնում չեղավ, ոչ մի կեղծիք չեղավ:

Բայց դե դա Ռոբերտ Քոչարյանն էր՝ Հայաստանի երբեմնի «միակ տղամարդը» (ինչպես ինքն էր ասում՝ Հայաստանում տղամարդ չի մնացել), իսկ հիմա էլ ո՞վ կարող է այդպիսի ընտրություններ կամ հանրաքվե կազմակերպել, ո՞վ կարող է իրականացնել «ժողովրդի կամարտահայտումը»:

Իհարկե, ոչ ոք, միայն իրենք էին, որ դա կարողանում էին, հատկապես 2008-ի Մարտի 1-ին շարժվեցին ըստ «ժողովրդի կամարտահայտման»:

Կարեն Վարդանյան