Խղճուկ բյուջե՝ նոր կոալիցիա ստեղծելու հեռանկարով

Երեկ խորհրդարանն ընդունել է հաջորդ տարվա բյուջեն՝ 97 կողմ, 12 դեմ, 3 ձեռնպահ ձայներով:

Եթե հակիրճ գնահատենք փաստաթղթի տնտեսական բաղկացուցիչը, ապա այն խղճուկ բյուջե է՝ ընդամենը 2,2% տնտեսական աճով: Բյուջե-2016-ն իր մեջ զարգացման ռեսուրս չի պարունակում. ընդամենն արձանագրում է, որ հաջորդ տարի մեր ժողովուրդն ավելի աղքատ է դառնալու:

Սակայն ուզում եմ անդրադառնալ բյուջեի քաղաքական հետևանքներին:

Հովիկ Աբրահամյանը երբեք չի թաքցրել իր քաղաքական հավակնությունները, Սերժ Սարգսյանի ժառանգորդը դառնալու ձգտումը: Սակայն կառավարման նման որակով, նման բյուջեով Արգամիչն ավելի շատ հավակնում է քավության նոխազի, քան ժառանգորդի կարգավիճակին:

Բյուջետային քննարկումներն ու քվեարկությունը նաև ուրվագծում են երկրի քաղաքական քարտեզը, քաղաքական դիրքավորումը՝ առնվազն մեկ տարվա կտրվածքով:

Ամիսներ առաջ' ԲՀԿ-ն արմատական դիրքերից մերկացնում էր կառավարության տնտեսական քաղաքականությունը, երեկ կողմ է քվեարկում տարվա հիմնական տնտեսական փաստաթղթին: Եթե սրան հավելենք նաև, որ այս կուսակցությունը սահմանադրական փոփոխությունների «Այո»-ի հետևողական պաշտպանն էր՝ դարձյալ ի հակառակ մի քանի ամսվա վաղեմության իր դիրքորոշման, ապա պետք է փաստենք՝ այս կուսակցությունը լրիվ կորցրել է քաղաքական իր ինքնուրույնությունը՝ վերածվելով Հովիկ Աբրահամյանի կցորդի:

ԲՀԿ-ն ակնհայտորեն ձգտում է նոր կոալիցիա ձևավորել ՀՀԿ-ի հետ: ԲՀԿ-ի ցանկությունից, սակայն, շատ քիչ բան է կախված կամ գրեթե ոչինչ կախված չէ: Իշխանություններն ուզեն՝ նոր ընտրությունից հետո կկազմեն կոալիցիա, կարող են նաև «գեղամյանացնել» այս կուսակցությանը՝ նրա մի քանի անդամի ընդգրկելով իրենց համամասնական ցուցակում: Ի վերջո, ԲՀԿ-ն կարող է որևէ կարգավիճակով ընդգրկված չլինել հաջորդ խորհրդարանում:

Մի փոքր այլ է ՀՅԴ-ի պարագան, որն, ի տարբերություն ԲՀԿ-ի, ունի ոչ միայն պատմություն և ավանդույթներ, այլ նաև մեծ հավակնություններ, իշխանությանն օրակարգ առաջադրելու համարձակություն:

Պարտադիր չէ, որ Դաշնակցության ակնկալիքներն ամբողջովին արդարանան, սակայն ավանդական կուսակցությունը շարունակում է սակարկել իշխանությունների հետ: Թերևս սա է պատճառը, որ սահմանադրական ռեֆորմին «Այո» ասած ՀՅԴ-ն չմասնակցեց բյուջետային քվեարկությանը՝ չփակելով իշխանությունների հետ բանակցելու ճանապարհը:

Անկախ ամեն ինչից՝ 2017թ. խորհրդարանական ընտրարշավը ոչ պաշտոնապես արդեն մեկնարկել, է ու քաղաքական զարգացումները պետք է դիտարկենք հենց այդ համատեքստում:

Սուրեն Սուրենյանց