Հայաստան-Վրաստան 400 կՎ էլեկտրահաղորդման գծի կառուցումը կավարտվի 2018թ. ընթացքում

«Կովկասյան էլեկտրահաղորդման ցանց» Հայաստան-Վրաստան 400 կՎ էլեկտրահաղորդման գծի կառուցման ծրագրի իրականացման ընթացքի և ժամկետների հետ կապված հարցերն են քննարկվել ՀՀ էներգետիկայի և բնական պաշարների նախարար Երվանդ Զախարյանի և գերմանական KfW բանկի (Վերականգնման վարկերի բանկ) ու «Ֆիխտներ» ընկերության պատվիրակության դեկտեմբերի 11-ին կայացած հանդիպման ժամանակ: Գերմանական պատվիրակությունը գլխավորել է բանկի էներգետիկայի և տրանսպորտի դեպարտամենտի ղեկավար Յան Բլումը:

Կողմերը միմյանց շնորհավորել են ծրագրի իրականացման երկրորդ փուլի վարկային համաձայնագրի ստորագրման առիթով, որի շրջանակներում KfW բանկը Հայաստանին կհատկացնի 83 մլն եվրո։ Դա հնարավորություն կտա միաժամանակ սկսել գծի կառուցման երկու փուլերի աշխատանքները, որոնք նախատեսվում է ավարտել 2018թ. ընթացքում։

Ընդգծելով ծրագրի նշանակությունը էլեկտրաէներգետիկ համակարգերի տարածաշրջանային ինտեգրման գործում՝ Ե. Զախարյանը կարևորել է աշխատանքների ժամանակին իրականացումը։ Կողմերը պայմանավորվել են ամեն ինչ անել սահմանված ժամանակացույցով՝ նախատեսված ժամկետներում օդային գծի և ենթակայանների կառուցումն ավարտելու համար։

Նախարարը շնորհակալություն է հայտնել Գերմանիայի կառավարությանը և KfW բանկին՝ Հայաստանի էներգետիկ բնագավառում իրականացվող ծրագրերին ցուցաբերած աջակցության համար։