Մնում է հրաժարականներ պահանջելը

Ինչ լա˜վ է, որ կա որևէ մեկի հրաժարական պահանջելու իրավունքը, թե չէ Րաֆֆի Հովհաննիսյանն ինչո՞վ պիտի զբաղվեր: «Բադասխան» պահանջելն այլևս արդիական չէ, որովհետև ոչ ոք այդպես էլ չի ուզում այդ «բադասխանը» տա: Մնում է հրաժարական պահանջելը: Ու Րաֆֆին լավ էլ պահանջում է...

Ընդամենն օրեր առաջ էր, որ ժամանակին մոտ կես միլիոն ձայն հավաքած քաղաքական լիդերը ասելիքի համառ փնտրտուքների արդյունքում եկավ հանգեց Պաշտպանության նախարար Սեյրան Օհանյանի հրաժարականը պահանջելու գաղափարին. ու պահանջեց: Այլ հարց է, թե պահանջը լսող կա, թե՝ ոչ: Կարևորը պահանջելն է, մեկը չլսի՝ մյուսից կպահանջի, մյուսն էլ չլսի՝ երրորդից կպահանջի:

Ինչն է շատ այս երկում՝ պաշտոնյաները, և նրանցից կարելի է անվերջ հրաժարականներ պահանջել: Այսօր էլ բացառություն չէր, հանրահավաք էր, Րաֆֆի Հովհաննիսյանն էլ ելույթ ունեցավ և, բնականաբար, պետք է ինչ-որ մեկի հրաժարականը պահանջել, մնում էր որոշելը, թե ում:

Սերժ Սարգսյանի հրաժարականը պահանջելը «Ժառանգության» առաջնորդն անիմաստ գտավ, որովհետև ասաց, թե «Սերժ Սարգսյանն արդեն հրաժարականի մեջ է»:

Այս արտահայտությամբ Րաֆֆին թեև հրաժարական չպահանջեց, սակայն լրացրեց հանրահայտ «ռեժիմը խուճապի մեջ է» շարքը («Ռեժիմը խուճապի մեջ է». Լևոն Զուրաբյան, «Ռեժիմը հոգեվարքի մեջ է». Գարեգին Չուքասզյան, «Սերժ Սարգսյանը հրաժարականի մեջ է». Րաֆֆի Հովհաննիսյան):

Եվ այսպես, Սերժ Սարգսյանը հրաժարականի մեջ է, դա հասկացանք, բայց հրաժարական պահանջելու հարցը դրանով չլուծվեց, ինչ-որ մեկից այնուամենայնիվ պետք է չէ՞ պահանջել: Եվ ահա Րաֆֆին գտավ նաև այդ «մեկին», այս անգամ Հովհաննիսյանի ուշադրության կենտրոնում կրկին հայտնվեց ոստիկանապետ Վլադիմիր Գասպարյանը, ում Րաֆֆին նախկինում մեծարելով «Զորավար» էր ասում: Իսկ այս անգամ Րաֆֆի Հովհաննիսյանը «հիասթափված» էր, և միակ բառը, որ կարողացավ ուղղել ոստիկանապետին՝ «դավայ»-ն էր: Մնում է հասկանալ, թե ինչ նկատի ուներ «դավայ» ասելով, պատասխան՝ վրան տեղադրելու վերաբերյալ զգուշացմա՞նը, թե՞ հիմա էլ ոստիկանապետի հրաժարականի պահանջ:

Րաֆֆի Հովհաննիսյանի քայլերի հաջորդականությունն ուսումնասիրելով կարելի է եզրակացնել, որ հրաժարականների պահանջները շարունակական բնույթ կկրեն և Հայաստանի ոչ մի պաշտոնյա չի խուսափի այդ պահաջից: Իսկ Հայաստանից հետո միգուցե նաև միջազգային մասշտաբների անցնի, օրինակ, պահանջի Աբու Բաքր ալ-Բաղդադիի հրաժարականը:

Կարեն Վարդանյան