«Լուսավոր Հայաստան» կուսակցությունը նոր գույն կբերի Հայաստանի քաղաքական ներկապնակում

ՀՀ Ազգային ժողովի պատգամավոր, «Լուսավոր Հայաստան» նախաձեռնության անդամ Էդմոն Մարուքյանը համոզված է' Հայաստանի քաղաքական ներկապնակում նոր գույն կավելանա «Լուսավոր Հայաստան» կուսակցության ստեղծմամբ: Դեկտեմբերի 12-ին կայացավ «Լուսավոր Հայաստան» կուսակցության հիմնադիր համագումարը: Կուսակցության 245 պատվիրակների մասնակցությամբ համագումարը համարվեց իրավազոր ու բացված:

Էդմոն Մարուքյանը հայտարարեց, որ այսօրվանից «Լուսավոր Հայաստան» կուսակցությունը սկսում է իր երկար քայլերթը դեպի լուսավոր Հայաստան: «Մեր կուսակցության առաջնային թիրախներից է կառավարման անարդյունավետ, շատ ծախսատար համակարգի փոփոխությունը: Մենք գտնում ենք, որ Հայաստանի Հանրապետությունը պետք է ունենա փոքր, բայց արդյունավետ կառավարություն: Մեր հաջորդ թիրախը կլինի կոռուպցիայի դեմ պայքարը, անողոք պայքար ենք մեղելու պետական միջոցների անարդյունավետ ծախսման դեմ: Մենք ստեղծելու ենք մի համակարգ, որի պայմաններում հարկատուն վստահ կլինի, որ իր վճարած հարկերը ծախսվում են իր պետության կարիքների համար»,-ասաց Էդմոն Մարուքյանը:

Նա նշեց, որ Լեռնային Ղարաբաղի հարցի կարգավորումը տեսնում են ուժեղ տնտեսություն ստեղծելու մեջ: «Մենք չենք կարող հայանպաստ լուծումներ ունենալ համահայկական խնդիրների համար, եթե չունենանք զարգացող տնտեսություն: Արցախի հարցի լուծման հայանպաստ տարբերակը տեսնում ենք ուժեղ տնտեսության մեջ»,-ավելացրեց պատգամավորը:

Էդմոն Մարուքյանը հայտնեց, որ կողմ են լինելու Հայաստանի' եվրոպական պետության մոդելի ձևավորմանը, ըստ այդմ' նա կոչ արեց վերսկսել բանակցությունները Եվրամիության հետ:

«Լուսավոր Հայաստան» նախաձեռնության մեկ այլ անդամ էլ' Հայկ Կոնջորյանը նշեց, որ Հայասանում պետք է շատ արագ տեղի ունենա քաղաքական սերնդափոխություն: Նրա խոսքով' քաղաքական վերնախավի միջին տարիքը բարձր է 55-ից, իսկ երիտասարդները մեծապես ընդգրկված չեն երկրի կառավարման գործում: «Երիտասարդները չպետք է մի քանի պատգամավորի տեսքով ներկայացված լինեն Ազգային ժողովում: Երիտասարդությունը, նոր գաղափարների, նոր արժեքների կրողը լինելով, պետք է քաղաքական սերնդափոխության կենսաբանական փաստը վերածի բովանդակային փոփոխության»,-ասաց Հայկ Կոնջորյանը' հավելելով, որ երիտասարդությունը Հայաստանի ներկան է, ոչ թե ապագան:

Համագումարի ժամանակ ելույթ ունեցան նաև նախաձեռնության այլ անդամներ: Ելույթների ավարտին քվերակությամբ կորոշվեն կուսակցության խորհրդի նախագահն ու անդամները: Կտրվի կուսակցության ձևավորման մեկնարկը:

Համաձայն «Լուսավոր Հայաստան» կուսակցության ծրագրի' նոր ստեղծվող քաղաքական ուժի նպատակն է ՀՀ-ում կառուցել հասարակության դինամիկ զարգացմանը նպաստող առաջադեմ, արդիական քաղաքական համակարգ, նպաստել քաղաքացիների շահերն արտահայտող հանրային քաղաքականության արդյունավետ ուղղությունների մշակմանը, ժողովրդավարական ներկայացուցչական ինստիտուտների ձևավորմանը և դրանց զարգացման նախադրյալների ապահովմանը: Կուսակցությունը ազատական, առաջադիական լուծումների և բարեփոխումների միջոցով զարգացմանը միտված կուսակցություն է: