Մարդն ընդամենը «նկարում» է

Ժողովրդի մեծ մասի կողմից որպես «թվանկարիչ» բնորոշված ԿԸՀ նախագահ Տիգրան Մուկուչյանը «Ժողովուրդ» թերթին տված իր հարցազրույցում խոսելով հանրաքվեի ժամանակ եղած կեղծիքների մասին՝ ասել է, թե ինքը որևէ խնդրի հետ կապված իրեն մեղավոր չի համարում, որովհետև որևէ արարք չի արել, որի համար պետք է իրեն մեղավոր համարի: Ահա այսպիսի «խուճուճ» մտքեր է կարողանում արտահայտել ԿԸՀ նախագահը, ով հավանաբար ինքն էլ իր պաշտոնի ձեռքը կրակն է ընկել:

Ու երբ ավելի խորը մտածում ենք՝ իսկապես ի՞նչ կարող է անել, ի՞նչ կա իր ձեռքում: Մեծ հաշվով՝ ոչինչ: Մուկուչյանն ընդամենն արատավոր համակարգի մասնիկն է՝ իր ֆունկցիան կատարող, նա չի որոշում՝ կեղծիք անել, թե չանել, այլ ընդամենը կատարում է իր առջև դրված խնդիրները: Կեղծիքներ անել-չանելը ավելի վերևից է որոշվում, իսկ կատարողներն էլ անում են տեղամասերում, թվերը հաղորդում ԿԸՀ-ին, ԿԸՀ-ն էլ վերջում ընդամենը դրանք արձանագրում է, ստացված թվերը՝ «նկարում»: Այսինքն, «թվանկարիչ» բնորոշումը համապատասխանում է իրականությանը. մարդն ընդամենը «նկարում» է, ի՞նչ գործ ունի նա կեղծիքներ անելու հետ:

Կարեն Վարդանյան