Երբ դժգոհում են արդեն ՀՀԿ-ականները

Ստանձնելով երկրի վարչապետի պաշտոնը՝ Հովիկ Աբրահամյանը, ի թիվս մյուս անկատար մնացած իր խոստումների, ասել էր նաև, որ երկրում պետք է ապահովի հավասար տնտեսական դաշտ: Թե որքանով դա դարձավ իրականություն կամ ընդհանրապես այս ուղղությամբ մի բան արվեց, թե ոչ, կարծում եմ՝ ներկայացնելու կարիք չկա, քանի որ ինքներս էլ ամեն ինչ տեսնում ենք, և ցանկացած գործարար կարող է հաստատել, թե ինչ վիճակ է այսօր տիրում տնտեսական դաշտում և ինչպիսի «հավասար» հնարավորություններ են ստեղծված գործարարների համար: Իհարկե, վարչապետը և կառավարությունը կշարունակեն պնդել, որ երկրում չկան մենաշնորհներ, որ խնդիրները լուծված են, հավասարություն կա, սակայն նման պնդումները համոզիչ չեն կարող լինել, որովհետև արդեն նույնիսկ ՀՀԿ-ական գործարարներն են հայտնում իրենց մտահգություններն այդ առիթով, ինչպես եղավ վերջերս տեղի ունեցած միջոցառումներից մեկի ժամանակ: Եվ եթե թեկուզ զգուշորեն, սակայն այնուամենայնիվ այդ կապակցությամբ լրագրողների մոտ իր մտահոգությունն է հայտնել ՀՀԿ-ական նախկին պատգամավոր, «Լուսակերտ» թռչնաբուծական ֆաբրիկայի սեփականատեր Խաչիկ Մանուկյանը, դա նշանակում է, որ տնտեսական դաշտը, իրոք, լավ վիճակում չէ, և գործարարների համար երկրում անհրաժեշտ պայմաններ այդպես էլ չստեղծվեցին:

Սա ևս մեկ հիշեցում էր, որ Հովիկ Աբրահամյանի գլխավորած կառավարությունն այդպես էլ գեթ մեկ քայլ առաջընթաց չգրանցեց:

Կարեն Վարդանյան