Ադրբեջանում պահանջում են 7 տարով ազատազրկել լրտեսության մեջ մեղադրվող լրագրողին

Ադրբեջանցի լրագրող Ռաուֆ Միրքադիրովի դեմ դատական գործը շարունակվում է: Ինչպես հաղորդում է «Արմենպրես»-ը՝ վկայակոչելով ադրբեջանական ԱՊԱ գործակալությունը, հերթական նիստի ժամանակ պետական մեղադրողը պահանջել է ազատազրկել լրագրողին 7 տարի ժամկետով:

Դատական նիստն անց է կացվել փակ դռների հետևում: Հաջորդ լսումները կկայանան դեկտեմբերի 23-ին:

Ադրբեջանցի լրագրող Ռաուֆ Միրքադիրովը ձերբակալվել է 2014 թվականի ապրիլի 19-ին' Թուրքիայից արտաքսվելուց անմիջապես հետո: Նրա դեմ ներկայացվել է իբր «Հայաստանի օգտին լրտեսություն անելու» և պետական դավաճանության մեղադրանք: Ադրբեջանական կողմի համոզմամբ' լրագրողը հայկական կողմին տեղեկատվություն է տրամադրել Ադրբեջանում ռազմական ուժերի տեղադրության վերաբերյալ: Ինքը' Միրքադիրովը, հերքում է նմանօրինակ մեղադրանքները' դրանք համարելով անհիմն: