Փակուղի

Ընդամենը շաբաթներ առաջ նույնիսկ սիրիական հարցում ունեցած հակադիր մոտեցումները չէր խանգարում, որ Ռուսաստանն ու Թուրքիան արդյունավետ համագործակցեին՝ էներգետիկ, զբոսաշրջության, շինարարության ոլորտներում, միասին փորձեին տարածաշրջանային համատեքստ ձևավորել:

Համագործակցությունը ստացել էր ինստիտուցիոնալ բնույթ՝ երկու երկրների Բարձրագույն խորհրդի ձևով: Երեկ դրա հերթական նիստը պետք է կայանար Սանկտ Պետերբուրգում, սակայն այն չկայացավ՝ թուրքերի կողմից ռուսական ՍՈւ-24-ի կործանման հետևանքով առաջացած ճգնաժամի պատճառով:

Անկարան չի սիրում, երբ իրեն նախապայմաններ են առաջադրում՝ թեև դա նրա սիրած գործելակերպն էր հայ-թուրքական չկայացած երկխոսության շրջանում: Հիմա Թուրքիային նախապայմաններ է առաջադրում Ռուսաստանը: Անկարայում այդ երկրի դեսպան Անդրեյ Կառլովը նշել է ռուս-թուրքական հաշտեցման երեք նախապայման. Թուրքիան պետք է ներողություն խնդրի խոցված ինքնաթիռի համար, փոխհատուցի ծախսերը, պատժի մեղավորներին:

Բնականաբար, Անկարան չի գնա նման քայլի, որովհետև համարժեք է համարում սահմանախախտ ռուսական ինքնաթիռին հարվածելը ու այդ հարցում ստացել է ՆԱՏՕ-ի աջակցությունը:

Փակուղի՝ մեկ բառով այսպես կարելի է բնութագրել ռուս-թուրքական այսօրվա հարաբերությունները, որոնց հեռանկարը կանխատեսելն անշնորհակալ գործ է:

Սուրեն Սուրենյանց